ვის გამოიძახებს სანიოლი ევრო 2024-ზე - სავარაუდო 26-კაციანი სია

მომდევნო კვირაში საქართველოს ნაკრების მთავარი მწვრთნელი, ვილი სანიოლი ევროპის ჩემპიონატისთვის "ჯვაროსანთა" საბოლოო განაცხადს დაასახელებს. 

ევროპული ფეხბურთის მმართველი ორგანიზაციის დადგენილების თანახმად, ეროვნულ ნაკრებებს უფლება მიეცათ, რომ თუ განაცხადში არა 23, არამედ 26 ფეხბურთელი შეიყვანონ. ეს არა სავალდებულო, არამედ ნებაყოფლობითია; მაგალითად, დიდიე დეშამსს გერმანიაში 25 მოთამაშე მიჰყავს, თუმცა ჩვენ ვივარაუდოთ, რომ სანიოლი კვოტას სრულად შეავსებს.

რთული არ არის იმის ვარაუდიც, რომ ის 23 ფეხბურთელი, რომლებიც მარტის მატჩების განაცხადში იმყოფებოდნენ, სიაში ახლაც მოხვდებიან. მათი ჩამონათვალი ასე გამოიყურება:

მეკარეები: გიორგი მამარდაშვილი, გიორგი ლორია, ლუკა გუგეშაშვილი.

მცველები: საბა კვერკველია, საბა საზონოვი, გურამ კაშია, გიორგი გველესიანი, ლაშა დვალი, ლუკა ლოჩოშვილი, ოთარ კაკაბაძე, ვლადიმერ მამუჩაშვილი, ლევან შენგელია, გიორგი წიტაიშვილი, გიორგი გოჩოლეიშვილი,

ნახევარმცველები: ოთარ კიტეიშვილი, ნიკა კვეკვესკირი, გიორგი ჩაკვეტაძე, სანდრო ალთუნაშვილი, გიორგი ქოჩორაშვილი, ანზორ მექვაბიშვილი, ჯაბა კანკავა,

თავდამსხმელები: გიორგი მიქაუტაძე, ბუდუ ზივზივაძე, გიორგი ქვილითაია, ზურიკო დავითაშვილი, ხვიჩა კვარაცხელია.

ერთადერთი, რომლის განაცხადიდან ამოვარდნაც შეიძლება იყოს მოსალოდნელი, ლევან შენგელიაა, რადგან "პანეტოიკოსის" 28 წლის ფლანგელს საბერძნეთთან შეხვედრაში მიღებული ტრავმა ჯერ კიდევ არ მოუშუშებია, თუმცა ივნისამდე მისი მწყობრში ჩადგომა მაინც უნდა მოესწროს. თუ გავითვალისწინებთ, თუ რამდენად მნიშვნელოვან მოთამაშედ მიიჩნევს ვილი ლევანს, არ გამოვრიცხოთ, იგი სათამაშო პრაქტიკის გარეშე ყოფნის პირობებშიც მოხვდეს განაცხადში.

რაც შეეხება 3 ვაკანტურ ადგილს, იქიდან 2-ს ჩვენ "დაკავებულად" განვიხილავთ. მარტის მატჩებში ირაკლი აზაროვისა და საბა ლობჟანიძის არყოფნა უდიდესი მოულოდნელობა გახლდათ, ახლა კი სანიოლს უჩნდება შესაძლებლობა, რომ ნაკრების ბირთვის წევრები ეროვნულ გუნდში დააბრუნოს. დონეცკის "შახტარის" ფეხბურთელმა უკრაინულ გუნდთან ერთად საშინაო დუბლი შეასრულა (ჩემპიონატი+თასი) და ნაკრებს ბრწყინვალე ხასიათზე შეუერთდება. საბაზე იმის თქმა შეგვიძლია, რომ "ატლანტა იუნაიტედმა" MLS-ის ახალ სეზონში 12 მატჩი ჩაატარა და ლობჟანიძე 12-ვეში სასტარტო შემადგენლობაში მოგვევლინა. განაცხადის 26-ე წევრად ქუთაისის "ტორპედოს" ნახევარმცველი, გიორგი არაბიძე შეიძლება მოგვევლინოს. მართალია, სანიოლიმ 26 წლის ფეხბურთელს სათამაშო ინტენსივობა დაუწუნა, მაგრამ განაცხადის გაფართოებიდან და ქომაგებში არსებული დიდი მოთხოვნიდან გამომდინარე, ფრანგმა სპეციალისტმა არაბიძე შეიძლება მაინც იახლოს ევრო 2024-ზე. 

აქვე შეგახსენებთ, რომ ევრო 2024 სტარტს 14 ივნისს აიღებს, "ჯვაროსნებს" კი პირველი მატჩი 18 ივნისს, თურქეთის ეროვნული გუნდის წინააღმდეგ ელოდებათ. ქართველთა სხვა მეტოქეები F ჯგუფში ჩეხეთისა და პორტუგალიის ნაკრებები იქნებიან.