ლიონელ მესის "ბარსელონაში" გატარებული წლების განმავლობაში უამრავი დიდებული მატჩი ჩაუტარებია, თუმცა, ცხადია, მის კარიერაში იყო წარუმატებელი შეხვედრებიც.

საფეხბურთო სტატისტიკის ერთ-ერთმა ყველაზე ცნობილმა სააგენტომ, Whoscored.com-მა მესის კატალონიური კარიერის ყველაზე ცუდი მატჩი დაასახელა (2009/2010 წლების სეზონიდან მოყოლებული, როცა ამ მონაცემების ათვლა დაიწყო).

როგორც აღმოჩნდა, ლეოს ყველაზე დაბალი შეფასება 2016/2017 წლების სეზონში მიუღია. ეს დაპირისპირება ჩემპიონთა ლიგის მერვედფინალური ეტაპის პირველი მატჩის ეგიდით გაიმართა და "ბარსელონამ" "პარი სენ ჟერმენთან" წააგო, ანგარიშით 0:4.

არგენტინელი მეგავარსკვლავის თამაში მაშინ 5.9 ქულით შეფასდა.

იმის შეხსენება, რაც განმეორებით შეხვედრაში მოხდა, ალბათ, არ გჭირდებათ. "ბარსელონამ" პარიზელებს 5-ბურთიანი სხვაობით (6:1) მოუგო და მეოთხედფინალში გავიდა, თავად მესი კი გოლით გამოირჩა.