• 29-11-2022
    A ჯგუფი: მერვედფინალში ნიდერლანდები და სენეგალი გავიდნენ
    A ჯგუფი: მერვედფინალში ნიდერლანდები და სენეგალი გავიდნენ
    Aa

    დღეს მსოფლიო ჩემპიონატზე ჯგუფური ეტაპის მესამე ტური დაიწყო და ჩვენ უკვე ორი მერვედფინალისტის ვინაობაც შევიტყვეთ - A ჯგუფიდან ტიტულისთვის ბრძოლას ნიდერლანდებისა და სენეგალის ნაკრებები გააგრძელებენ.


    ნიდერლანდელებმა პლეი ოფის საგზური კატართან გამარჯვებით მოიპოვეს. "ნარინჯისფრები" 26-ე წუთზე კოდი გაკპომ დააწინაურა. "პსვ-ს" ახალგაზრდა თავდამსხმელმა მუნდიალის ზედიზედ მე-3 მატჩში გაიტანა და ბომბარდირთა დავაში კილიან მბაპეს გაუთანაბრდა. ახლა ორივე მათგანის ანგარიშზე 3-3 გოლია. 


    ლუის ვან გაალის შეგირდებმა თამაშში ინტრიგა 49-ე წუთზე მოკლეს - თავი ფრენკი დე იონგმა გამოიჩინა. მალე თავისი გოლი სტივენ ბერგუისმაც შეაგდო, თუმცა იგი კომბინაციის დაწყების მომენტში გაკპოს ხელით თამაშის გამო გაუქმდა.


    ნიდერლანდების ნაკრებმა მატჩი მშვიდად მიიყვანა გამარჯვებამდე, ჯგუფში 7 ქულით პირველი ადგილი გაინაღდა და ახლა B ჯგუფის მეორეადგილოსნის გამოვლენას დაელოდება, რადგან მერვედფინალში სწორედ მას დაუპირისპირდება. რაც შეეხება კატარს, მასპინძლებმა ტურნირი ქულის გარეშე და მხოლოდ 1 გატანილი გოლით დაასრულეს.


    ალ ჰორი. "ალ ბაითი". 66 784 მაყურებელი


    ნიდერლანდები 2:0 კატარი 


    გოლები: 1:0 გაკპო (26), 2:0 დე იონგი (49)


    ნიდერლანდები: ნოპერტი; ტიმბერი, ვან დეიკი, აკე; დუმფრისი, დე როონი (კუპმაინერსი 82), ფ. დე იონგი (ტეილორი 86), ბლინდი; კლაასენი (ბერგუისი 66); გაკპო (ვერგოსტი 82), დეპაი (იანსენი 66)


    კატარი: ბარშამი; მოჰამადი (ხოდერი 85), მიგელი, ხუხი, ჰასანი, აჰმედი; ჰატემი (ალააელდინი 85), მადიბო (ბუდიაფი 64), ალ ჰაიდოსი (ასადალა 64); ალმოეზ ალი (მუნტარი 64), აფიფი


    გაცილებით დიდი ინტრიგა ჰქონდა ეკვადორისა და სენეგალის ნაკრებების დაპირისპირებას. ლათინოამერიკელებს მეორე პოზიციის დასაკავებლად 1 ქულად ეყოფოდათ, "ტერანგას ლომებს" კი აუცილებლად უნდა მოეგოთ.


    არსებული მდგომარეობა თამაშის სტარტს ნამდვილად შეეტყო. ეკვადორელები ძირითადად თავიანთი კარის უსაფრთხოებაზე იყვნენ კონცენტრირებულნი. რეალური საგოლე შანსები ხელიდან გაუშვეს იდრისა განა გეიმ და ბულაიე დიამ, თუმცა გუნდს მშველელად ისმაილა სარი მოევლინა. "უოტფორდის" შემტევმა თავისივე აკიდებული თერთმეტმეტრიანი ბრწყინვალედ შეასრულა და აფრიკელები 44-ე წუთზე დააწინაურა.


    თამაშის სურათი დიდად არც მეორე ტაიმში შეცვლილა, მაგრამ ეკვადორმა ანგარიშის გათანაბრება მაინც შეძლო. ეს 67-ე წუთზე, ცარიელ კართან მარტო დარჩენილმა მოიზეს კაისედომ გააკეთა და "ტრიკოლორი" ლაივ-ცხრილში კვლავ მე-2 პოზიციაზე დააბრუნა. ასე მოულოდნელად გაშვებული გოლი სენეგალისთვის უდიდესი შოკი გახლდათ, ოღონდ ეს შოკი სულ 3 წუთის განმავლობაში გაგრძელდა. სენეგალმა სტანდარტული სიტუაციიდან გაშვებულ გოლს სტანდარტული სიტუაციიდან გატანილი გოლითვე უპასუხა - გადამწყვეტ მომენტში მოწოდების სიმაღლეზე კალიდუ კულიბალი იყო. სხვათა შორის, ეროვნულ ნაკრებში კალიდუმ პირველად გაიტანა.


    ეკვადორელებს თამაშის გადასარჩენად დაახლოებით 25 წუთი ჰქონდათ, თუმცა მათ საქმე რეალურ მომენტებამდეც კი ვერ მიიყვანეს. სენეგალმა გაიმარჯვა და A ჯგუფიდან მეორე ადგილით გავიდა. პლეი ოფში აფრიკის მოქმედი ჩემპიონების მეტოქე B ჯგუფის პირველადგილოსანი იქნება.


    ალ რაიანი. "ხალიფა ინტერნაციონალი". 44 569 მაყურებელი


    ეკვადორი 1:2 სენეგალი 


    გოლები: 0:1 სარი (44, პენ), 1:1 კაისედო (67), 1:2 კულიბალი (70)


    ეკვადორი: გალინდესი, ტორესი, ინკაპიე, ესტუპინიანი, პრესიადო, გრუესო (სიფუენტესი 46), ფრანკო (სარმიენტო 46), კაისედო, ესტრადა (რეასკო 64), ვალენსია, პლატა


    სენეგალი: ედუარ მენდი, კულიბალი, იაკობსი, საბალი, დიალო, იდრისა გეიე, სისი (ნაპალი მენდი 74), ნდიაი (ნდიენგი 75), სარი, პაპ გეიე, დია (სისე 90+5)

    Facebook კომენტარები