• 03-12-2022
    H ჯგუფი: ბრაზილიაც დამარცხდა, შვეიცარია მეორეა
    H ჯგუფი: ბრაზილიაც დამარცხდა, შვეიცარია მეორეა
    Aa

    კატარის მსოფლიო ჩემპიონატზე ჯგუფური ეტაპი ჩამთავრდა. რამდენიმე წუთის წინ დამთავრებულმა მატჩებმა ბოლო, მე-16 მერვედფინალისტი გამოავლინა - ბრაზილიასთან ერთად, H ჯგუფიდან პლეი ოფში შვეიცარიის ნაკრები გავიდა.


    ევროპელებმა მერვედფინალის საგზური სერბეთის ეროვნული გუნდის ანგარიშით 3:2-ით დამარცხების შემდეგ მოიპოვეს. სერბებთან უპირატესობას შვეიცარიელები ქულის აღების შემთხვევაშიც შეინარჩუნებდნენ, თუმცა ამ გამარჯვებით ისინი კამერუნის ნაკრებისთვისაც მიუწვდომელნი გახდნენ.


    თამაში გარდამავალი უპირატესობით დაიწყო. ჯერ ბრიენ ემბოლოსა და გრანიტ ჯაკას ჰქონდათ საგოლე მომენტები, ამას კი სერბებმა ზივკოვიჩის მიერ ბურთის ძელისთვის გარტყმით უპასუხეს. მე-20 წუთზე ანგარიში გაიხსნა - თავი ქსერდან შაქირიმ გამოიჩინა. 6 წუთში წონასწორობა "ფულემის" ცენტრფორვარდმა ალექსანდრ მიტროვიჩმა აღადგინა, რომელსაც ასისტენტობა დუშან ტადიჩმა გაუწია. "არწივები" მალე წინაც გავიდნენ, რაც დუშან ვლაჰოვიჩის გოლის დამსახურება გახლდათ (35'), მაგრამ ბრიენ ემბოლომ გუნდები შესვენებაზე თანაბარი ანგარიშით გაიყვანა (44').


    "წითელმა ჯვრებმა" ბალკანელებს გადამწყვეტი დარტყმა მეორე ტაიმის სტარტზევე მიაყენეს. რემო ფროილერის მიერ 48-ე წუთზე გატანილმა გოლმა მურატ იაკინის გუნდს ის უპირატესობა მოუპოვა, რომელიც მათ ხელიდან აღარ გაუშვიათ.


    ჯგუფის მეორე შეხვედრაში ბრაზილიისა და კამერუნის ნაკრებებმა მოულოდნელი შედეგი დააფიქსირეს. ტიტემ "სელესაოს" წამყვან ფეხბურთელებს დასვენების საშუალება მისცა, რაც კამერუნელთა მრავალ საგოლე შანსში გამოიხატა. მიუხედავად აფრიკელთა იერიშებისა, ედერსონი კარის მშრალად შენახვას ახერხებდა, მაგრამ შეხვედრის დამატებულ დროში ვინსენტ აბუბაქარმა ბრაზიელელები მაინც დაამწუხრა. გამოცდილმა თავდამსხმელმა გოლი მაისურის გახდით აღნიშნა, მეორე ყვითელი ბარათი მიიღო და მოედანი მატჩის დასრულებამდე შვიდიოდე წუთით ადრე დატოვა, თუმცა კაცნაკლულობას "ლომებისთვის" გამარჯვების ბოლომდე მიყვანაში ხელი არ შეუშლია.


    მაშასადამე, ბრაზილიამ H ჯგუფი 6  ქულით მოიგო და მერვედფინალში სამხრეთ კორეის ნაკრებს შეხვდება. 6 ქულა აქვს მეორეადგიოლოსან შვეიცარიასაც, თუმცა გატანილ-გაშვებული გოლების უკეთესმა სხვაობამ პირველობა ტიტეს გუნდს არგუნა. სწორედ ამიტომ, შვეიცარიელები მერვედფინალში პორტუგალიის ნაკრებს დაუპირისპირდებიან. რაც შეეხებათ ჯგუფში ჩარჩენილებს, 4-ქულიანი კამერუნი მესამეზეა, სერბეთი კი ასპარეზობას 1 ქულით, ბოლო პოზიციაზე ასრულებს.

    Facebook კომენტარები