• 03-12-2022
    ნიდერლანდები 3:1 აშშ - ჰოლანდია პირველი 1/4ფინალისტია
    ნიდერლანდები 3:1 აშშ - ჰოლანდია პირველი 1/4ფინალისტია
    Aa

    დენზელ დუმფრისის გოლისა და ორი ასისტის წყალობით ნიდერლანდების ნაკრებმა აშშ-ს ეროვნულ გუნდს ანგარიშით 3:1 მოუგო და კატარის მსოფლიო ჩემპიონატის პირველი მეოთხედფინალისტი გახდა.


    შეხვედრის პირველი შანსი ამერიკელებს შეექმნათ. კრისტიან პულიშიჩი "ნარინჯისფრების" კიპერთან პირისპირ დარჩა, თუმცა მისი დარტყმული ანდრიეს ნოპერტმა ფეხით მოიგერია. ამ შანსის ხელიდან გაშვების გამო იანკები მალევე დაისაჯნენ - მე-10 წუთზე ნიდერლანდების ეროვნულმა გუნდმა სწრაფი კონტრშეტევა განახორციელა და მემფის დეპაის გატანა არ გასჭირვებია. სხვათა შორის, ამ გოლის შემდეგ მემფისმა "ნარინჯისფერთა" ისტორიაში საუკეთესო ბომბარდირთა შორის მე-2 ადგილზე გადაინაცვლა.


    დაწინაურებამ ლუის ვან გაალის შეგირდები შედარებით დაამშვიდა, აშშ კი ხეირიანად შეტევას ვერ ახერხებდა. შესვენებაზე გუნდები მხოლოდ ერთი გოლით გასვლას უახლოვდებოდნენ, როცა ევროპელებმა კიდევ ერთხელ შეაგდეს. პირველი ტაიმის პირველ დამატებულ წუთზე დენზელ დუმფრისმა ისევ მარჯვენა ფლანგიდან ჩააწოდა და ბურთი დეილეი ბლინდს დაასვა. "აიაქსის" მცველმაც მეტ ტერნერის კარი აიღო - 2:0.


    მეორე ტაიმი "ვარსკვლავებმა და ზოლებმა" ცვლილებებით დაიწყეს, თუმცა თამაშის სცენარში მათ ცვლილება მხოლოდ 76-ე წუთზე შეიტანეს. კრისტიან პულიშიჩის გადაცემას ჰაჯი რაიტი ლამის აკრობატული დარტყმით გამოეხმაურა, რის მერეც ბურთი ნიდერლანდელთა კარში ძალიან უცნაური ტრაექტორიით ჩაეშვა. სხვათა შორის, ამ გოლამდე წუთებით ადრე ჰაჯიმ ძალიან რეალური მომენტი გააცუდა, თუმცა, როგორც ხედავთ, მან შეცდომის გამოსწორება შეძლო.


    მოულოდნელად გატანილ გოლს აშშ-ს ნაკრებზე დამმუხტველად უნდა ემოქმედა. იანკებმა ანგარიშის გასათანაბრებლად გაიწიეს, მაგრამ გუნდის შემტევები კვლავ დაცვის ხაზმა დააღალატა. 81-ე წუთზე საჯარიმოში სრულიად მარტო დარჩენილმა დუმფრისმა ზუსტად დაარტყა და საბოოლო რეზულტატიც (3:1) დააფიქსირა.


    ნიდერლანდების ნაკრები ახლა მეოთხედფინალშია და არგენტინა-ავსტრალიის წყვილში გამარჯვებულს ელოდება. ამ გუნდების ჯახი თბილისის დროით 23 საათზე დაიწყება.


    ალ რაიანი. "ხალიფა ინტერნაციონალი". 44 846 მაყურებელი


    ნიდერლანდები 3:1 აშშ 


    გოლები: 1:0 დეპაი (9), 2:0 ბლინდი (45+1), 2:1 რაიტი (76), 3:1 დუმფრისი (81)


    ნიდერლანდები: ნოპერტი; ტიმბერი, ვან დეიკი, აკე (დე ლიხტი 90); დუმფრისი, დე როონი (ბერგვაინი 46), ფ. დე იონგი, ბლინდი; კლაასენი (კუპმაინერსი 46); გაკპო (ვერგოსტი 90), დეპაი (სიმონსი 82)


    აშშ: ტერნერი; დესტი (იედლინი 75), ზიმერმანი, რიმი, რობინსონი (მორისი 90); მაკკენი (რაიტი 67), ადამსი, მუსა; ვეა (აარონსონი 67), ფერეირა (რეინა 46), პულიშიჩი

    Facebook კომენტარები