• 04-12-2022
    არგენტინა 2:1 ავსტრალია - "ალბისელესტეს" სვლა გრძელდება
    არგენტინა 2:1 ავსტრალია - "ალბისელესტეს" სვლა გრძელდება
    Aa

    არგენტინის ნაკრებმა ავსტრალიის ეროვნული გუნდი ანგარიშით 2:1 დაამარცხა და მსოფლიო ჩემპიონატის მეოთხედფინალში გავიდა, სადაც ნიდერლანდებს დაუპირისპირდება.


    დღის მეორე მერვედფინალური მატჩი საკმაოდ მძიმედ დაიწყო. "კენგურუები" მთლიანად თავდაცვაზე იყვნენ ორიენტირებულნი, "ალბისელესტე" კი რეალურ ხიფათს ვერ ქმნიდა. ამ სიტუაციაში ფავორიტებს მშველელად ისევ ლეო მესი მოევლინათ - 35-ე წუთზე ლეომ მეტ რაიანს საჯარიმოს შიგნიდან აუღებელი დაურტყა და გუნდი დააწინაურა. სხვათა შორის, ეს მესისთვის პირველი გოლი გახლდათ მსოფლიო ჩემპიონატების პლეი ოფში. პირველი ნახევრის ბოლომდე არაფერი შეცვლილა და არგენტინა შესვენებაზე მინიმალური უპირატესობით გავიდა.


    მეორე ტაიმის სტარტზე ვერცხლისქვეყნელთა გოლკიპერი, ემილიანო მარტინესი ძალიან არადამაჯერებლად გამოიყურებოდა და რამდენჯერმე კურიოზულ შეცდომასთანაც კი იყო ახლოს, თუმცა ეს შეცდომა არა დიბუმ, არამედ მისმა ვიზავიმ, მეტ რაიანმა დაუშვა. 57-ე წუთზე გამოცდილ კიპერს როდრიგო დე პაულმა წაართვა ბურთი, რომელიც დაუცველ კარში ხულიან ალვარესმა გადაგზავნა. არგენტინა უკვე ორი გოლით იგებდა.


    მიღებულმა უპირატესობამ ლიონელ სკალონის შეგირდები მცირედით მოადუნა, რაც ავსტრალიელთა გოლში გამოიხატა - 77-ე წუთზე "კენგურუებმა" შორიდან გაისროლეს, ბურთი ენცო ფერნანდესს მოხვდა და თეთრ-ცისფრების კარში აღმოჩნდა. საფინალო სასტვენამდე დაახლოებით 20 წუთით ადრე მოედანზე ვითარება ძალიან დაიძაბა.


    დარჩენილ დროში შანსები ორივე გუნდს შეექმნა. 82-ე წუთზე ავსტრალიელთა ფლანგელმა აზიზ ბეჰიჩმა ჩინებული დრიბლინგი შემოგვთავაზა და სოლოგოლის გატანაში ხელი მხოლოდ ლისანდრო მარტინეზის თავგანწირულმა თამაშმა შეუშალა. ამის შემდეგ გოლის გატანის ორი რეალური მომენტი ლაუტარო მარტინესს შეექმნა, თუმცა მილანის "ინტერის" ცენტრფორვარდმა მესის ვერცერთი გადაცემა დაუფასა. ბოლო შანსი მაინც ავსტრალიელებს ჰქონდათ - გარანგ კუოლი მარტინეზთან პირისპირ აღმოჩნდა, თუმცა "ასტონ ვილას" კიპერმა მატჩი დამატებით დროში გადაყვანისგან იხსნა.


    არგენტინელებმა ამ გამარჯვებით მეოთხედფინალში გააღწიეს, სადაც ნიდერლანდების ნაკრებს შეხვდებიან. მატჩი 9 დეკემბერს, თბილისის დროით 23 საათზე დაიწყება.

    Facebook კომენტარები