• 05-12-2022
    ინგლისი 3:0 სენეგალი - "სამი ლომი" საფრანგეთისთვის მზადაა
    ინგლისი 3:0 სენეგალი - "სამი ლომი" საფრანგეთისთვის მზადაა
    Aa

    გუშინ მსოფლიო ჩემპიონატზე პირველი სუპერმეოთხედფინალური წყვილი მივიღეთ, არგენტინისა და ჰოლანდიის ნაკრებების ჯახის სახით, დღეს კი კიდევ ერთი დიდი მატჩი ჩაინიშნა - საფრანგეთის ნაკრები ინგლისის ეროვნულ გუნდს დაუპირისპირდება.


    როგორც მოგეხსენებათ, "მამლებმა" მეოთხედფინალის საგზური პოლონეთის დამარცხებით მიიღეს, "სამმა ლომმა" კი მერვედფინალში სენეგალს უშანსოდ მოუგო, ანგარიშით 3:0.


    თამაში გარდამავალი უპირატესობით დაიწყო. აფრიკის თასის მოქმედი გამარჯვებულები ფავორიტად შერაცხულ მეტოქეს არ უშინდებოდნენ და მომენტებსაც ქმნიდნენ - 23-ე წუთზე ისმაილა სარმა გადააცილა ბურთი ხარიხას, 31-ე წუთზე კი ბულაიე დიას აჯობა ჯორდან პიკფორდმა. 


    ინგლისელები მალე მიხვდნენ, რომ საქმისთვის ხელი სერიოზულად უნდა მოეკიდათ და ანგარიშიც გახსნეს. 38-ე წუთზე ჯუდ ბელინგემმა შესანიშნავი გადაცემით კარის წინ მარტოდ დარჩენილი ჯორდან ჰენდერსონი მოძებნა; "ლივერპულის" ნახევარმცველმაც ედუარდ მენდის გაუტანა. აქედან 8 წუთში თავისი გოლი ჰარი კეინმაც გაიტანა. "სამი ლომი" შესვენებაზე ორბურთიანი უპირატესობით გავიდა.


    მეორე ტაიმში გარეთ საუთგეიტის შეგირდებმა თამაშის ინტრიგა საბოლოოდ მოკლეს. ეს ბუკაიო საკამ 57-ე წუთზე გააკეთა, როდესაც ფილ ფოდენს ბრწყინვალე პასი დაუფასა.


    ამის შემდეგ "სამ ლომს" მატჩის გამარჯვებამდე მიყვანა აღარ გასჭირვებია. ინგლისის ნაკრები კვლავ რჩება იმ იშვიათ გუნდთა შორის, რომლებსაც მიმდინარე მსოფლიო ჩემპიონატზე მატჩი ჯერ კიდევ არ წაუგიათ (ნიდერლანდებთან, ხორვატიასთან და მაროკოსთან ერთად).


    აქვე გეტყვით, რომ საფრანგეთისა და ინგლისის მეოთხედფინალური მატჩი 10 დეკემბერს, თბილისის დროით 23 საათზე დაიწყება.


    ალ ჰორი. "ალ ბაითი". 65 985 მაყურებელი


    ინგლისი 3:0 სენეგალი


    გოლები: 1:0 ჰენდერსონი (39), 2:0 კეინი (45+3), 3:0 საკა (57)


    ინგლისი: პიკფორდი; უოკერი, სტოუნსი (დაიერი 76), მაგუაირი, შოუ; ჰენდერსონი (ფილიპსი 82), რაისი, ბელინგემი (მაუნთი 76); საკა (რაშფორდი 65), კეინი, ფოდენი (გრილიში 65)


    სენეგალი: ე. მენდი; საბალი, კულიბალი, დიალო, იაკობსი (ბალო-ტურე 85); დიატა (პ. სარი 46), სისი (გეიე 46), ნ. მენდი, ი. სარი; ნდიაიე (დიენგი 46); დია (დიედიუ 72)

    Facebook კომენტარები