ფეხბურთის ფედერაციის მიერ გავრცელებული ინფორმაციის თანახმად, უეფას 21-წლამდე ევროპის ჩემპიონატის მეორე ტურის მატჩზე, საქართველოსა და ბელგიის ნაკრებებს შორის, 30 ათასზე მეტი ბილეთი უკვე გაყიდულია.
შეხვედრაზე დასასწრები დარჩენილი ბილეთების გაყიდვა დინამო არენას სალაროებში 23 ივნისის 20:00 საათამდე გაგრძელდება.
მატჩის დღეს, 24 ივნისს, უეფას უსაფრთხოების მოთხოვნებიდან გამომდინარე, თამაშზე დასასწრები ბილეთების შეძენა მესხის სტადიონის სალაროებში 10:00 საათიდან 18:00 საათამდე გაგრძელდება. პარალელურად, ბილეთები იყიდება ონლაინ რეჟიმში under21ticekts.ge-ზე.
საგულისხმოა, რომ ევროპის 21-წლამდე ჩემპიონატზე ყველაზე მეტი მაყურებელი 1996 წლის 31 მაისს, ბარსელონაში, ესპანეთი - იტალიის ფინალს დაესწრო. აღნიშნულ შეხვედრას 35.500 მაყურებელი ესწრებოდა.
ქართველ გულშემატკივარებს რეკორდის მოხსნის ძალიან კარგი შანსი აქვს. ამიტომაც ქომაგებმა აუცილებლად უნდა იაქტიურონ.
სფფ-ის გენერალური მდივანმა, დავით მუჯირმა გულშემატკივრებს ბილეთების ყიდვისკენ მოუწოდა:
"24 ივნისს, 20:00 საათზე, ბელგიასთან მნიშვნელოვანი თამაში გველის. მატჩზე დასასწრები 30 ათასზე მეტი ბილეთი უკვე გაყიდულია და ბილეთების რეალიზაცია ჯერ კიდევ აქტიურად გრძელდება.
მატჩის დღეს, ბილეთები გაიყიდება under21tickets.ge-ზე და მიხეილ მესხის სახელობის სტადიონის სალაროებში 18:00 საათამდე. მოვუწოდებ გულშემატკივარს, რომ შეიძინონ ბილეთები ონლაინ.
დიდი მადლობა ქართველ გულშემატკივარს ასეთი ინტერესისთვის. იმედი მაქვს, რომ წარმატებული სტარტი ბელგიასთან მატჩში გაგრძელდება და რთულ ჯგუფში წარმატების მიღწევას შევძლებთ". - განაცხადა მუჯირმა.
ცნობისთვის, ევროპის ჩემპიონატის მეორე ტურის შეხვედრა საქართველოსა და ბელგიის ახალგაზრდულ ნაკრებებს შორის 24 ივნისს, 20:00 საათზე დაიწყება.
შეგახსენებთ, რომ პირველი ტურის შეხვედრას საქართველოს და პორტუგალიის 21-წლამდე ნაკრებებს შორის 24 425 მაყურებელი დაესწრო.