• 22-01-2023
    ალვეშის საქმე - ყველაფერი, რაც ამ მომენტისთვის ვიცით
    ალვეშის საქმე - ყველაფერი, რაც ამ მომენტისთვის ვიცით
    Aa

    როგორც მოგეხსენებათ, ცნობილი ფეხბურთელი, დანი ალვეში, ბარსელონაში მდებარე ციხეში უკვე 3 დღეა იმყოფება. ბრაზილიელი ლეგენდა ასეთ დღეში მას შემდეგ აღმოჩნდა, რაც სასამართლომ ალვეშის მხარეს გირაოს შუამდგომლობა არ დაუკმაყოფილა და ფეხბურთელი საპატიოში სექსუალური ძალადობის საქმეზე გამოძიების დასრულებამდე გამოკეტა.


    ალვეში, რომელიც პარასკევამდე მექსიკური "პუმასის" ღირსებას იცავდა, გასულ კვირას მექსიკიდან ესპანეთში ჩაფრინდა, რათა სიდედრის პანაშვიდს დასწრებოდა. მისი მიზანი მექსიკაში რაც შეიძლება მალე დაბრუნება და "პუმასთან" ერთად ვარჯიშის "ლეონთან" მატჩამდე განახლება გახლდათ, მაგრამ მას კატალონიის პოლიციაში მოუწია გამოცხადება, შენობის დატოვების უფლება კი აღარ მიეცა.


    სექსუალური ძალადობა, რომლის გამოც დანის 4-12 წლამდე პატიმრობა ემუქრება, გასული წლის 30 დეკემბერს ბარსელონას ღამის კლუბში უნდა დაფიქსირებულიყო. 39 წლის ფეხბურთელი იქ მეგობრებთან ერთად იმყოფებოდა. 23 წლის ქალბატონის თქმით (რომელმაც ალვეშს პოლიციაში უჩივლა), იგი სუტონის კლუბში 2 მეგობარ გოგონასთან ერთად მივიდა და VIP ზონიდან მიპატიჟება მექსიკელთაგან მიიღო. მიმტანმა გოგონებს უთხრა, რომ მექსიკელები მათ თავიანთ მაგიდასთან უხმობდნენ.


    ესპანური გამოცემების, El Mundo-სა და El Pais-ის მიხედვით, მიპატიჟების ინიციატორი ალვეში იყო. ბრაზილიელმა საკუთარი თავი პეტანკის (უძველესი ფრანგული თამაში) მოთამაშედ წარმოადგინა და თქვა, რომ ბარსელონას გარეუბან ლ'ჰოსპიტალეტიდან იყო. დანის ნამდვილი იდენტობა გოგონას მექსიკელებმა გაანდეს, თუმცა, როგორც დაზარალებული აცხადებს, მან არ იცოდა, თუ ვინ იყო იგი. ჩვენების მიხედვით, ცეკვის დროს ალვეშმა გოგონას ხელი რამდენჯერმე წაიღო საკუთარი პენისისკენ და ყოველ ჯერზე დიდ წინააღმდეგობას წააწყდა.


    ბრაზილიელმა ქალს დერეფანში გაყოლა სთხოვა, რომელიც, როგორც აღმოჩნდა, პატარა სააბაზანოს უერთდებოდა. სწორედ აქ მოხდა სექსუალური ძალადობაც, ადგილობრივი დროით 04:30 საათზე. დაზარალებული აცხადებს, რომ ფეხბურთელმა მას დაარტყა და გააუპატიურა. სააბაზანო პირველმა სწორედ ბრაზილიელმა დატოვა, შემდეგ კი კლუბიდანაც გავიდა. მსხვერპლმა საკუთარი მეგობრები მოძებნა, მათ კი კლუბის დაცვის სამსახურს მიმართეს. სწორედ ამის შემდეგ გააქტიურდა სექსუალური ძალადობის მსხვერპლთა დახმარების პროტოკოლიც.


    კატალონიის პოლიცია მიმართვიდან 5 წუთში მოვიდა ადგილზე, მაგრამ ალვეში იქ უკვე აღარ გახლდათ. სასწრაფომ გოგონა ბარსელონას ერთ-ერთ კლინიკაში გადაიყვანა, სადაც მისი სხეულს გამოკვლევაც ჩაუტარდა და მნიშვნელოვანი მტკიცებულებები იქნა აღმოჩენილი. 2 იანვარს დაზარალებულმა საჩივარი დაწერა, რასაც თან კლინიკის დასკვნა და ის ტანსაცმელი დაურთო, რაც შემთხვევის ღამეს ეცვა. ამ დროისთვის 39 წლის ფეხბურთელი მექსიკაში იმყოფებოდა.


    სასამართლომ ქალბატონის ჩვენება დამაჯერებლად ჩათვალა. კატალონიის პოლიცია ალვეშს დაუკავშირდა და მას პოლიციის განყოფილებაში გაესაუბრა, სანამ ბარსელონას საქალაქო სასამართლოში გადაიყვანდნენ. სანამ დაზარალებულის გამოკითხვა მიმდინარეობდა, ბრაზილიელი საკანში იჯდა. ქალის ნაამბობი დაადასტურა როგორც ფიზიკურმა მტკიცებულებებმა, ასევე

    ღამის კლუბის კამერებმაც. კამერების ჩანაწერებში კარგად ჩანს, რომ დანის გოგონა სააბაზანოში მიჰყავს და იქ დაახლოებით 16 წუთს ატარებს. 


    მაშინ, როდესაც შემთხვევაზე პრესაში პირველი ცნობები გავრცელდა, ალვეშმა TV3-ს განუცხადა, რომ კლუბში თავის მეგობრებთან საცეკვაოდ იმყოფებოდა და არც იცოდა, ვინ იყო მომჩივანი ქალბატონი. დაკითხვისას დანიმ თავდაპირველი ნათქვამი შეცვალა და განაცხადა, რომ ქალთან სექსი ჰქონდა, თუმცა მასზე არ უძალადია და ყველაფერი შეთანხმებულად მოხდა.


    ასე და ამგვარად, ალვეში კვლავ საპატიმროში რჩება, რადგან არსებობს რისკი, რომ მან ქვეყანა დატოვოს. საამისო ფინანსური შესაძლებლობები ვეტერან ფეხბურთელს ნამდვილად გააჩნია და მას ესპანეთთან არც რაიმე ისეთი აკავშირებს, რასაც ვერ მიატოვებს. დანის პატიმრობაში დარჩენის მიზეზად Diario AS-ის მიერ სახელდება ისიც, რომ ბრაზილიურ და ესპანურ ორგანოებს ექსტრადირების ხელშეკრულება გაფორმებული არ აქვთ.

    ტეგები:
    Facebook კომენტარები