ევრო 2024-ის ფინალურ ეტაპზე დარჩენილი სამი საგზურიდან ერთ-ერთს საქართველოსა და საბერძნეთის ნაკრებები 26 მარტს "დინამო არენაზე" გაითამაშებენ.

"ჯვაროსნებს" ოპტიმიზმის საფუძველი ნამდვილად აქვთ - გუნდს თავისი მთავარი ვარსკვლავი, ხვიჩა კვარაცხელია უბრუნდება, ბორის პაიჭაძის სახელობის სტადიონის პირთამდე გავსებული ტრიბუნები კი თავის როლს აუცილებლად ითამაშებენ, თუმცაღა უნდა აღინიშნოს ისიც, რომ თავიანთი კოზირები ბერძნებსაც გააჩნიათ. ერთ-ერთი ასეთი კოზირი ისტორიული გამოცდილება გახლავთ.

საქმე იმაში მდგომარეობს, რომ ევროპულ ფეხბურთში ძალიან რთულად მოიძებნება საქართველოსთვის იმაზე უხერხული მეტოქე, ვიდრე საბერძნეთია.

ელადელებს ისტორიაში სულ 9-ჯერ შევხვედრივართ. სტატისტიკა მართლაც რომ შემაშფოთებელია: 2 ფრე და 7 მარცხი.

პირველად ბერძნებთან 1996 წელს დავმარცხდით, ამხანაგურ შეხვედრაში, ანგარიშით 1:2. ქართველთა ერთადერთი გოლი გოჩა გოგრიჭიანმა მე-15 წუთზე შეაგდო. რაც შეეხება უკანასკნელ წაგებას, იგი 2021 წლის 9 ოქტომბრით თარიღდება. "აჭარაბეთ არენას" ცარიელი ტრიბუნების წინაშე ჩატარებულ შეხვედრაში, რომელიც ფიფას 2022 წლის მსოფლიო ჩემპიონატის შესარჩევი ეგიდით შედგა, მეტოქემ ორი უპასუხო გოლი გაგვიტანა.

სრული სტატისტიკა ასე გამოიყურება:

1996 წლის 8 მაისი - საბერძნეთი 2:1 საქართველო - საერთაშორისო ამხანაგური მატჩი

1998 წლის 14 ოქტომბერი - საბერძნეთი 3:0 საქართველო - ევრო 2000-ის შესარჩევი ეტაპი

1999 წლის 5 ივნისი - საქართველო 1:2 საბერძნეთი - ევრო 2000-ის შესარჩევი ეტაპი

2005 წლის 26 მარტი - საქართველო 1:3 საბერძნეთი - მსოფლიოს 2006 წლის ჩემპიონატის შესარჩევი ეტაპი

2005 წლის 12 ოქტომბერი - საბერძნეთი 1:0 საქართველო - მსოფლიოს 2006 წლის ჩემპიონატის შესარჩევი ეტაპი

2010 წლის 3 სექტემბერი - საბერძნეთი 1:1 საქართველო - ევრო 2012-ის შესარჩევი ეტაპი

2011 წლის 11 ოქტომბერი - საქართველო 1:2 საბერძნეთი - ევრო 2012-ის შესარჩევი ეტაპი

2021 წლის 31 მარტი - საბერძნეთი 1:1 საქართველო - მსოფლიოს 2022 წლის ჩემპიონატის შესარჩევი ეტაპი

2021 წლის 9 ოქტომბერი - საქართველო 0:2 საბერძნეთი - მსოფლიოს 2022 წლის ჩემპიონატის შესარჩევი ეტაპი

როგორც ხედავთ, სტატისტიკა კარგს არაფერს გვიქადის, მაგრამ ყველა ნავსი ადრე თუ გვიან ტყდება, სამშაბათი საღამო კი ამისთვის მართლაც რომ იდეალური დრო უნდა იყოს.