გავრცელებული ინფორმაციით, მატს ჰუმელსის დამატებით "ლევერკუზენის ბაიერი" დაინტერესდა. ბუნდესლიგის ჩემპიონები ვეტერან მცველს განიხილავენ, როგორც ჯონათან ტას შეცვლის ერთ-ერთ მთავარ ფავორიტს.

Kicker-ის თანახმად, "ლევერკუზენი" ჰუმელსის დამატებას იმ შემთხვევაში ეცდება, თუ მიუნხენის "ბაიერნი" მათი ცენტრალური მცველის სანაცვლოდ 40 მილიონი ევროს გადახდას გადაწყვეტს. მთავარი, რაც ჩაბი ალონსოს გუნდს ჰუმელსში მოსწონს, ეს ლიდერობის განსაკუთრებული უნარებია.

შეგახსენებთ, რომ ჰუმელსმა "დორტმუნდის ბორუსიიდან" წასვლის შესახებ ჩემპიონთა ლიგის ფინალში მარცხიდან ორი კვირის შემდეგ განაცხადა. ყველაფერი მწვრთნელთან, ედინ ტერზიჩთან დაპირისპირების ჭორების ფონზე მოხდა. ასევე გეტყვით, რომ გუნდი ტერზიჩმაც დატოვა და "ყვითლებს" სათავეში მისი შტაბის წევრი, ნური შაჰინი ჩაუდგა.

ნებისმიერ შემთხვევაში, ჰუმელსის შემდეგი ნაბიჯი საინტერესო იქნება. Bild-მა ასევე გამოაცხადა, რომ გერმანელის დამატების მიმართ ინტერესს "მილანი" და "ინტერი" გამოხატავენ.