დღეს ცნობილი გახდა იმ ფეხბურთელებისა და მწვრთნელების ვინაობა, რომლებიც უეფას წლის საუკეთესოს პრიზისთვის იბრძოლებენ.

2023 წლის საუკეთესო ფეხბურთელის ჯილდოს ფინალისტები არიან:

ერლინგ ჰოლანდი (მანჩესტერ სიტი)

კევინ დე ბრუინი (მანჩესტერ სიტი)

ლეო მესი (ინტერ მაიამი)

შეგახსენებთ, რომ ერლინგ ჰოლანდმა გასულ სეზონში 52 გოლი გაიტანა და "სიტისთან" ერთად ტრიპლეტი მოიგო. არანაკლებ შთამბეჭდავი სეზონი ჰქონდა მის ბელგიელ თანაგუნდელსაც. რაც შეეხება ლეოს, მისი მთავარი მიღწევა კატარში მოგებული მსოფლიო ჩემპიონატია.

უეფას წლის საუკეთესო ფეხბურთელად "ლა პულგა" კარიერაში ორჯერაა დასახელებული. ორივეჯერ იგი ჩემპიონთა ლიგის მოქმედი გამარჯვებული გახლდათ, "ბარსელონასთან" ერთად.

რაც შეეხება მთავარ მწვრთნელს, სამეული შემდეგნაირია:

პეპ გვარდიოლა (მანჩესტერ სიტი)

სიმონე ინძაგი (ინტერი)

ლუჩიანო სპალეტი (ნაპოლი)

გვარდიოლას წარმატებაზე უკვე მოგახსენეთ. სიმონე ინძაგიმ "ინტერს" იტალიის თასი და სუპერთასი მოაგებინა და ჩემპიონთა ლიგის ფინალში გაიყვანა. სპალეტიმ კი "ნაპოლის" ისტორიაში მესამედ მოუპოვა სერია ა-ს ტიტული.

უეფამ აქვე გამოაცხადა, რომ წლის საუკეთესო ქალი ფეხბურთელისა და მწვრთნელის პრიზის ფინალისტები მომავალ კვირაში გამოვლინდებიან. დაყოვნების მიზეზად ქალთა მსოფლიო ჩემპიონატის მომავალი ფინალია, რომელიც სულ რამდენიმე დღეში, ესპანეთისა და ინგლისის ნაკრებებს შორის შედგება.