"მანჩესტერ სიტიმ" "ბრენტფორდთან" გასვლითი მატჩი მოიგო და პრემიერ ლიგის ლიდერ "ლივერპულთან" ჩამორჩენა 2 ქულამდე დაიყვანა.

მასპინძლები ნილ მოპეს მიერ 21-ე წუთზე გატანილი გოლით იგებდნენ, მათ მეკარეს, მარკ ფლეკენს კი 9 სეივი ჰქონდა პირველ ტაიმში მითვლილი, თუმცა ტაიმის მიწურულს ფილ ფოდენმა აღადგინა წონასწორობა, მეორე ნახევარში კი კიდევ 2 გოლი შეაგდო. საბოლოო ანგარიშიც 1:3 დაფიქსირდა.

ჰეთ-თრიქით დასრულებულ მატჩზე 24 წლის ინგლისელმა კლუბის ვებსაიტთან ისაუბრა.

"ჩემპიონობისთვის ბრძოლა დაძაბული იქნება. "ლივერპული" და "არსენალი" ძალიან კარგად გამოიყურებიან. ისინი ბოლომდე გამოგვყვებიან, ამიტომ უნდა ვეცადოთ, რომ ჩვენი ყველა მატჩი მოვიგოთ.

ჩვენს გამძლეობას სეზონიდან სეზონამდე ვამტკიცებთ. ყველას ვაოცებთ იმით, რომ უმაღლეს სტანდარტს ვინარჩუნებთ, ეს კი მწვრთნელისა და ფანტასტიკური შემადგენლობის დამსახურებაა. როცა საქმეები კარგად არ მიდის, ყველაფერს კალაპოტში ერთიანი ძალებით ვაბრუნებთ.

რატომ აღვნიშნე გოლები განსხვავებულად? ამაზე ბიჭები მეხუმრებიან. ისინი მეუბნებიან, რომ 5-5-ზე თამაშებში ზედმეტად ბევრჯერ ვურტყამ და სნაიპერს მეძახიან. ამიტომ ვიფიქრე, რომ გოლი ასე უნდა მეზეიმა. სნაიპერის ნიშანი გასახდელში, ჩემს კარადაზეც კი დამხვდა," - თქვა ფილმა.

შეგახსენებთ, რომ "სიტის" "ლივერპულზე" 1-ით ნაკლები მატჩი აქვს ჩატარებული, ამიტომ ინგლისის ჩემპიონატის პოტენციური ლიდერი ახლა სწორედ პეპ გვარდიოლას გუნდია. ეს გამოტოვებული შეხვედრა "სიტიზენებს" კვლავ "ბრენტფორდის" წინააღმდეგ ელოდებათ.