როგორც ვიცით, მადრიდის "რეალში" ხოსელუ, რომელმაც ჩემპიონთა ლიგის ნახევარფინალში, შეცვლაზე შემოსულმა მიუნხენის "ბაიერნს" დუბლი შეუსრულა და გუნდი ფინალში გაიყვანა, კლუბში იჯარის წესით იმყოფება.

34 წლის ფორვარდი "თეთრებმა" "ესპანიოლიდან" დაიმატეს და მის გამოსასყიდად მათ მხოლოდ და მხოლოდ 1.5 მილიონი ევროს გადახდა მოუწევთ. El Chiringuito-ს ცნობით, ხოსელუ სანტიაგო ბერნაბეუზე დარჩენასთან ძალიან ახლოსაა, თუმცა კლუბს საბოლოო გადაწყვეტილება ჯერ კიდევ არ მიუღია.

ბოლო დროს გავრცელებული ინფორმაციით, მადრიდის "რეალი" ესპანელს კონტრაქტის 1 წლით გახანგრძლივებას სთავაზობდა, რაც მორიგი იჯარის ხელშეკრულებისკენ მიანიშნებს. თუმცა, დიდი ალბათობით, კილიან მბაპეს გადმოსვლის უდიდესი შანსია სწორედ ის მიზეზი, რის გამოც არ სურთ მადრიდში ხოსელუსთან გრძელვადიანი კონტრაქტის დადება.

ესპანელმა მოახერხა და ამ მცირე დროშიც კი მადრიდელთა გასახდელში ერთ-ერთი ყველაზე პოზიტიური და გუნდელთათვის საყვარელი პიროვნება გახდა. ცნობისთვის, მის ანგარიშზე მიმდინარე სეზონში ჩატარებულ 47 მატჩში 16 გოლია.