ლონდონის "არსენალმა" პრემიერ ლიგის სატურნირო ცხრილში პირველ ადგილზე გადაინაცვლა! "მეთოფეებს" "ბრენტფორდის" წინააღმდეგ უმნიშვნელოვანესი გამარჯვება კაი ჰავერცმა, 89-ე წუთზე გატანილი გოლით მოაპოვებინა. გერმანელი ნახევარმცველი თამაშში 78-ე წუთზე ჩაერთო, თუმცა თავის გამოსაჩენად მცირე დროც ეყო.

წარმატებული მატჩის შემდეგ გერმანელმა ვარსკვლავმა მცირე კომენტარიც გააკეთა.

"ვფიქრობ, საბოლოო ჯამში, ყველაზე მნიშვნელოვანი არის გუნდი და აღებული 3 ქულა ჩემთვისაც კარგია. ძალიან ბევრი ვიმუშავე, რომ ეს მომენტები კიდევ განმეცადა და ახლა ძალიან, ძალიან ბედნიერი ვარ.

აქ მოსაგებად ჩამოვედით და სახლში 3 ქულით წასვლა ბრწყინვალე შეგრძნებაა.

საკუთარ თავებზე უნდა ვფოკუსირდეთ, მატჩები მოვიგოთ და ვნახოთ, რა მოხდება," - თქვა ჰავერცმა.

კაის პრემიერ ლიგის მიმდინარე სეზონში უკვე 2 გოლი აქვს გატანილი. რაც შეეხება "არსენალს", მეორეადგილოსან "მანჩესტერ სიტის" გუნდი 1 ქულით უსწრებს.