ჩემპიონთა ლიგის მერვედფინალის მეოთხე სათამაშო დღის მთავარი გმირი "პორტუს" ბრაზილიელი შემტევი, გალენო გახდა. 26 წლის ფეხბურთელმა ლონდონის "არსენალის" კარი მატჩის 94-ე წუთზე გატანილი ულამაზესი გოლით აიღო.

"დრაკონების" გამარჯვებით დასრულებული მატჩის მერე გალენომ მცირე კომენტარი გააკეთა და აღნიშნა, რომ მისი გუნდი ლონდონშიც იმის გაკეთებას ეცდება, რაც საშინაო კედლებში გააკეთა.

"ჩემი გოლი მთელი გუნდის მიერ 90 წუთის განმავლობაში გაწეული სამუშაოს დამსახურებაა. ბევრი ვიშრომეთ, თავი კარგად დავიცავით და ენერგია მატჩის ბოლო წუთებზეც შეგვრჩა.

დარტყმის შანსი მომეცა და გამიმართლა, რომ შესანიშნავი გოლი გავიტანე, რომელმაც გამარჯვება მოგვიტანა. მოხარული ვარ, რომ ჩემი გოლი მომგებიანი გამოდგა. 

მიუხედავად ამისა, ჯერ არაფერია გადაწყვეტილი. ლონდონშიც იმის ჩადენას ვეცდებით, რაც აქ გავაკეთეთ. ვიქნებით ერთ მუშტად შეკრულნი და თავს დავიცავთ. ლონდონიდან მეოთხედფინალის საგზურით უნდა დავბრუნდეთ," - თქვა გალენომ.

შეგახსენებთ, რომ გუშინდელ მატჩში "მეთოფეებს" კარში ერთხელაც კი არ დაურტყამთ. "პორტუმ" პრემიერ ლიგის მოქმედი ვიცე-ჩემპიონები სრულიად გაანეიტრალა და "ემირეიტსზე" უპირატესობით ჩავა. 

"არსენალისა" და "პორტუს" განმეორებითი შეხვედრა 12 მარტს გაიმართება.