• 11-05-2022
    "ატლეტიკომ" და "ინტერმა" შეიძლება არგენტინელები გაცვალონ
    "ატლეტიკომ" და "ინტერმა" შეიძლება არგენტინელები გაცვალონ

    არგენტინელი თავდამსხმელის, ხოაკინ კორეას მილანის "ინტერში" ტრანსფერი ისე არ წარიმართა, როგორც ელოდნენ. ახალგაზრდა შემტევმა "ნერაძურის" მაისურით ჩატარებულ 33 მატჩში სულ 4 გოლი გაიტანა და, ალბათ, "ნერაძური" ზაფხულში არც გამოისყიდიდა, "ლაციოსთან" რომ წინასწარი შეთანხმება არ ჰქონდეს გაფორმებული.


    "ლაციალეს" "შავ-ლურჯებმა" 23.6 მილიონი ევრო უნდა გადაუხადონ, რასაც კლუბი თავიდან ვერ აიცილებს.


    TNT Sports-ის ინფორმაციით, "ინტერნაციონალე" "ელ ტუკოთი" იმდენადაა იმედგაცრუებული, რომ მისი გამოსყიდვისთანავე გასხვისებას განიხილავს. დიდი ალბათობით, მილანელები მას გაცვლაში ჩართავენ.


    "ინტერის" აღმასრულებელმა დირექტორმა, ჯუზეპე მაროტამ უკვე შეარჩია ის კლუბი, რომელთანაც ბარტერი უნდა გაიჩარხოს - "ატლეტიკო მადრიდი".


    "როხიბლანკოს" ნახევარმცველის, როდრიგო დე პოლის სიტუაცია ძალიან წააგავს კორეას მდგომარეობას, ამიტომ შესაძლებელია, კლუბებმა სწორედ ეს არგენტინელები გაუცვალონ ერთმანეთს. თანაც, დე პოლს სერია ა-ში თამაშის დიდი გამოცდილება აქვს, რადგან მიმდინარე სეზონამდე ის "უდინეზეს" ღირსებას იცავდა.


    მიუხედავად ამისა, TNT Sports-ის შეფასებით, "ატლეტიკო" აღნიშნულ ბარტერზე თანხმობას მაინც არ განაცხადებს, რადგან როდრიგოსთან ასე მარტივად განშორებას არავინ აპირებს.


    ცნობისთვის, დე პოლმა მიმდინარე სეზონში 2-2 გოლითა და ასისტით გამოიჩინა თავი.

    Facebook კომენტარები