• 08-06-2022
    გატუზო "ვალენსიაში" ყველასთვის ცნობილი მეკარის მიყვანას აპირებს - რა ელის მამარდაშვილს
    გატუზო "ვალენსიაში" ყველასთვის ცნობილი მეკარის მიყვანას აპირებს - რა ელის მამარდაშვილს

    შესაძლოა, ჯენარო გატუზომ "ვალენსიაში" იტალიური "ნაპოლის" 33 წლის გოლკიპერი დავიდეu ოსპინა მოიწვიოს. აღნიშნულ ინფორმაციას გამოცემა ElDesmarque Valencia ავრცელებს.


    როგორც მოგეხსენებათ, "ღამურებმა" უკვე გაათავისუფლეს ხოსე ბორდალასი მთავარი მწვრთნელის თანამდებობიდან. გამოცდილი სპეციალისტის ჩამნაცვლებლად გატუზო განიხილება და მიუხედავად იმისა, რომ ეს ოფიციალურად არ დადასტურებულა, ჯენაროს "მესტალიაზე" მოსვლას წინ ვერაფერი აღუდგება. გატუზო კი ოსპინას შესანიშნავად იცნობს, რადგან მასთან ერთად "ნაპოლიში" მუშაობდა.


    El Desmarque-ს ინფორმაციით, "ლოს ჩეს" მეკარეთა ბაზარზე აქტიურობა ისედაც გადაწყვეტილი აქვს:


    "ვალენსია" მეკარეთა ბაზარზე აქტიური იქნება, რადგან მას მერე, რაც სასტარტოში ადგილი დაკარგა, იასპერ სილესენი წასვლაზე ფიქრობს, გიორგი მამარდაშვილს კი კონტრაქტი ჯერ კიდევ არ გაუხანგრძლივებია."


    რაც შეეხება ოსპინას, კოლუმბიელი მეკარის სიტუაცია "ღამურების" წისქვილზე ასხამს წყალს. II Matino-ს ცნობით, თავისუფალი აგენტობის გზაზე დამდგარი გოლკიპერი "ნაპოლისთან" ახალ კონტრაქტზე შეთანხმებას ვერ ახერხებს, რადგან ხელფასად წელიწადში 3 მილიონ ევროს ითხოვს, კლუბი კი მხოლოდ 2 მილიონი ევროს მიცემაზეა თანახმა.


    ამ წყაროს თანახმად, არაა გამორიცხული, გატუზომ ოსპინაც და ოსპინას ყოფილი სიძე - ხამეს როდრიგესი ლა ლიგაში თამაშზე დაითანხმოს.


    აქვე გეტყვით, რომ გასულ სეზონში დავიდე სერია ა-ს 31 მატჩში მიიღო მონაწილეობა, გაუშვა 25 გოლი და კარი მშრალად 13-ჯერ შეინახა.

    Facebook კომენტარები