• 23-11-2022
    პაბლო გავი მსოფლიო ჩემპიონატების ისტორიაში შევიდა
    პაბლო გავი მსოფლიო ჩემპიონატების ისტორიაში შევიდა
    Aa

    რამდენიმე წუთის წინ დასრულდა მსოფლიო ჩემპიონატის E ჯგუფის მატჩი, რომელშიც ესპანეთმა კოსტა-რიკა გაანადგურა, ანგარიშით 7:0.


    შეხვედრა "ფურია როხას" უზარმაზარი უპირატესობით წარიმართა. კონკაკაფის ბინადრებმა კარისკენ ერთხელაც კი ვერ დაარტყეს, პირენეელთა 7 დარტყმიდან კი 7-ვე საგოლე გამოდგა.


    მატჩი განსაკუთრებით შედეგიანი "ბარსელონას" დესანტისთვის გახლდათ. დუბლი შეასრულა ფერან ტორესმა, ხოლო პაბლო გავიმ გოლი და საგოლე გადაცემა მიითვალა.


    დღის ყველაზე ლამაზი გოლი სწორედ პაბლოს ანგარიშზე გახლდათ. "ლა მასიას" გაზრდილმა ტალანტმა ალვარო მორატას ჩინებულ გადაცემას ფეხი საჯარიმოს მისადგომებთან დაუხვედრა და ულამაზესი მომენტი შექმნა.


    სხვათა შორის, გავი გახდა ესპანეთის ნაკრების ისტორიაში ყველაზე ახალგაზრდა ფეხბურთელი, რომელმაც მსოფლიო ჩემპიონატზე გოლი გაიტანა.


    საერთოდაც, პაბლოზე ახალგაზრდა ასაკში მუნდიალზე გოლი 1958 წლის შემდეგ არ გაუტანიათ. მაშინ ეს ლეგენდარულმა პელემ შეძლო და შვედეთს დუბლი შეუსრულა.


    აქვე შეგახსენებთ, რომ ესპანეთი თავის მომდევნო მატჩს კვირას, გერმანიის ნაკრების წინააღმდეგ გამართავს.

    Facebook კომენტარები