• 15-05-2024
    ბარახა: "ამ სეზონში მამარდაშვილი უფრო სტაბილური გახდა"
    ბარახა: "ამ სეზონში მამარდაშვილი უფრო სტაბილური გახდა"

    ლა ლიგის სეზონი დასასრულისკენ მიდის. გიორგი მამარდაშვილის "ვალენსიას" ორად ორი მატჩიღა დარჩა ჩასატარებელი, რომელთაგან ბოლოსწინას ხვალ, "რეალ სოსიედადის" წინააღმდეგ გამართავს.

    მატჩისწინა პრესკონფერენციაზე "ღამურების" მთავარმა მწვრთნელმა, რუბენ ბარახამ ქართველი გოლკიპერის შესახებ ისაუბრა.

    "ყველაფერი, რასაც გიორგი მოედანზე აჩვენებს, მისი შესაძლებლობების დამსახურებაა. იგი უმაღლესი კლასის მეკარეა და არაა გასაკვირი, რომ ეს ფაქტი უკეთეს გუნდად გვაქცევს. მამარდაშვილის სეივები ჩვენთვის ქულების მომტანია.

    მიმდინარე სეზონში გიორგი უფრო სტაბილური გახდა. შეცდომის დაშვებისგან არც ისაა დაზღვეული, მაგრამ მისი პროგრესი შესამჩნევია. ქართველმა ყველა მოლოდინს გადააჭარბა. იგი ჩვენთვის ძალიან მნიშვნელოვანი ფეხბურთელია," - თქვა ბარახამ.

    მიუხედავად იმისა, რომ "ლოს ჩეს" თავკაცი 23 წლის მეკარეს ასეთ საკვანძო მოთამაშედ მიიჩნევს, ზაფხულში ის მაინც შეიძლება გაყიდონ.

    Marca-ს თუ დავუჯერებთ, მამარდაშვილით "ნიუკასლ იუნაიტედია" დაინტერესებული. ახალგაზრდა მეკარეს 40 მილიონ ევროდ დააფასებენ, არაბული ინვესტიციით წელგამართულ "კაჭკაჭებს" კი ამ თანხის გადახდა არ უნდა გაუჭირდეთ.


    Facebook კომენტარები