• 13-05-2022
    "არტეტა ბევრს წუწუნებს" - რა თქვა კონტემ დერბის მოგების შემდეგ
    "არტეტა ბევრს წუწუნებს" - რა თქვა კონტემ დერბის მოგების შემდეგ

    გუშინ შედგა პრემიერ ლიგის გადადებული მატჩი, სადაც ლონდონის "ტოტენჰემმა" თანაქალაქელ "არსენალს" უმასპინძლა და გამანადგურებელი ანგარიშით დაამარცხა - 3:0.


    "მეთოფეებმა" შეხვედრა აქტიურად დაიწყეს, მაგრამ 15 წუთის შუალედში მათ საქმე მოუმთავრეს - 22-ე წუთზე ჰარი კეინმა პენალტი გაიტანა, 33-ე წუთზე რობ ჰოლდინგი გააგდეს, 4 წუთში კი კეინმა დუბლი გაიფორმა. ათკაციანმა "არსენალმა" ვეღარაფერი გააწყო და 47-ე წუთზე სონ ჰონ მინისგანაც მიიღო გოლი.


    "ემირეიტსის" ბინადართა თავკაცმა, მიკელ არტეტამ მატჩის მერე თქვა, რომ თუ იმას იტყოდა, რასაც ფიქრობდა, 6-თვიან დისკვალიფიკაციას მიიღებდა. ბუნებრივია, ესპანელმა სპეციალისტმა შეხვედრის არბიტრის, პოლ ტირნის გადაწყვეტილებები იგულისხმა, რამეთუ პენალტისა და გაძევების ეპიზოდიც საკამათო იყო.


    ამას "ტოტენჰემის" მთავარი მწვრთნელი, ანტონიო კონტე გამოეხმაურა და მიკელს წუწუნის შეწყვეტისკენ მოუწოდა.


    "ვფიქრობ, მიკელ არტეტა ნამდვილად კარგი მწვრთნელია.


    მან ეს საქმე ახლახანს დაიწყო და ვფიქრობ, ბევრს წუწუნებს. ჩემი აზრით, უმჯობესი იქნება, თუ საკუთარ გუნდზე უფრო ფოკუსირდება და წუწუნს შეწყვეტს.


    არტეტა უნდა დამშვიდდეს და მუშაობა გააგრძელოს. ის ძალიან კარგია, მაგრამ მწვრთნელისგან წუწუნის მოსმენას კარგს ვერ ვუწოდებ. არა უშავს, წითელი ბარათი ჩემთვის აშკარა იყო," - თქვა იტალიელმა სპეციალისტმა.


    შეგახსენებთ, რომ გუშინდელი მატჩის შედეგმა პრემიერ ლიგის ოთხეულისთვის ბრძოლა კიდევ უფრო დაძაბა. მე-4 ადგილზე მყოფი "არსენალი" მე-5-ადგილოსან "ტოტენჰემს" 1 ქულით უსწრებს. კვირას "დეზები" "ბარნლის" შეხვდებიან, "არსენალი" კი "ნიუკასლის" დამარცხებას ორშაბათს ეცდება.

    Facebook კომენტარები