"ნიუკასლ იუნაიტედის" ბრაზილიელი ნახევარმცველი, ბრუნო გიმარაეში "ბარსელონაში" თამაშზე ოცნებობს, - იუწყება SPORT-ის ჟურნალისტი, ტონი ხუანმარტი.

წყაროს თანახმად, ბრუნომ "ჯორდებთან" დადებულ კონტრაქტში საიდუმლო პუნქტი ჩაადებინა, რომელიც მას უფლებას აძლევს, რომ გუნდი 65-70 მილიონი ევროს სანაცვლოდ დატოვოს, თუ დაინტერესებული კლუბი "ბლაუგრანა" იქნება.

ცხადია, 25 წლის შუახაზელის ტრანსფერის განხორციელება "ლურჯ-ბროწეულისფერთათვის" ძალიან რთული იქნება, რადგან კლუბისთვის 70 მილიონი ევროც საკმაოდ სოლიდური თანხაა.

მიუხედავად ამისა, გიმარაეშმა იმედი არ უნდა დაკარგოს - ბოლო ფეხბურთელი, რომლის ოცნებაც "ბარსას" მაისურის მორგება გახლდათ, ახლა კატალონიურ გრანდში ირიცხება. ცხადია, ჟოაუ ფელიქსს ვგულისხმობთ.

აქვე გეტყვით, რომ მიმდინარე სეზონში ბრაზილიელმა 11 მატჩში მიიღო მონაწილეობა. მან 1 გოლი და 2 ასისტი მიითვალა.

ბრუნო "კაჭკაჭებმა" 2022 წლის იანვარში, ლიონის "ოლიმპიკიდან" შეიძინეს. გიმარაეში "ნიუკასლს" 42 მილიონი ევრო დაუჯდა.