• 06-07-2022
    ჯეკოს სერია ა-ს 3 კლუბი უმიზნებს
    ჯეკოს სერია ა-ს 3 კლუბი უმიზნებს

    მილანის "ინტერის" თავდამსხმელი, ედინ ჯეკო სერია ა-ს 3 კლუბის სამიზნეა.


    ბოსნიელ ცენტრფორვარდს მომავალ სეზონში სათამაშო დროის შეზღუდვა ელის, რადგან "ნერაძურიმ" მის პოზიციაზე რომელუ ლუკაკუ დაიმატა და გაძლიერებას პაოლო დიბალათიც გეგმავს.


    FCInterNews.it-ის ინფორმაციით, სერია ა-ში ახლადაღზევებული "მონცა" ჯეკოს გადაბირებას ეცდება, თუ მაურო იკარდის შეძენას ვერ მოახერხებს.


    სილვიო ბერლუსკონის ამბიციურ კლუბს ელიტაში გაწევრიანების აღნიშვნა ხმაურიანი ტრანსფერით სურს. სწორედ ამიტომ უმიზნებენ ისინი იკარდის, თუმცა არგენტინელის "პარი სენ ჟერმენიდან" წაყვანა არც ისე იოლი ამბავია.


    გარდა "მონცასა", ჯეკო ტურინის "იუვენტუსისა" და "ნაპოლის" რადარებზეც იმყოფება. მიუხედავად ამისა, თუ ბერლუსკონის კლუბში ბოსნიელს ძირითად შემადგენლობაში ადგილი გარანტირებული ექნება, პიემონტურ და ნეაპოლურ გუნდებში ასე არ იქნება.


    "ბიანკონერიში" ედინს დუშან ვლაჰოვიჩის რეზერვისტობა ელის, ხოლო "პარტენოპეიში" ვიქტორ ოსიმენის შემცვლელის როლი ექნება.

    Facebook კომენტარები
    მეტი სიახლის ნახვა