რომის "ლაციოს" სერბი ნახევარმცველით, სერგეი მილინკოვიჩ-სავიჩით დაინტერესებულ კლუბთა რიცხვს მილანის "ინტერიც" შეუერთდა.
La Gazzetta dello Sport-ის ინფორმაციით, სიმონე ინძაგი ამ კვირაში "ნერაძურის" ხელმძღვანელობას შეხვდება და სატრანსფერო გეგმებზე ისაუბრებს. შეხვედრაზე აუცილებლად გაიჟღერებს მილინკოვიჩ-სავიჩის გვარიც.
მილანურ კლუბს შემადგენლობიდან რამდენიმე მოთამაშის გაშვება დასჭირდება, რათა "ლაციალეს" 28 წლის ვარსკვლავის ტრანსფერის განხორციელება შეძლოს.
"არწივები" მილინკოვიჩ-სავიჩს შედარებით დაბალ ფასად გაუშვებენ, რადგან სერბს კლუბთან კონტრაქტი მომდევნო წელს ეწურება, ახალი ხელშეკრულების გაფორმებას კი არ აპირებს.
გასულ სეზონში სერგეიმ 47 მატჩში მიიღო მონაწილეობა, გაიტანა 11 გოლი და გააკეთა 8 საგოლე გადაცემა.
რაც შეეხება "ინტერნაციონალეს", კლუბი "სასუოლოს" ნახევარმცველს, დავიდე ფრატეზისაც უმიზნებს. ფრატეზი "იუვენტუსისა" და "რომას" ინტერესთა სფეროშიც იმყოფება.