• 22-11-2022
    მექსიკა 0:0 პოლონეთი - ოჩოა ისევ გმირია
    მექსიკა 0:0 პოლონეთი - ოჩოა ისევ გმირია
    Aa

    არგენტინის მიერ საუდის არაბეთთან განცდილი შოკისმომგვრელი მარცხის შემდეგ, C ჯგუფის მეორე მატჩმა, რომელშიც ერთმანეთს მექსიკისა და პოლონეთის ეროვნული გუნდები უპირისპირდებოდნენ, განსაკუთრებული მნიშვნელობა შეიძინა. ამ შეხვედრაში გამარჯვებული ჯგუფის პირველობაზე სერიოზულ პრეტენზიას განაცხადებდა, თუმცა გუნდებმა თავიანთი შანსი ხეირიანად ვერ გამოიყენეს.


    შეხვედრის პირველი ტაიმი მექსიკელთა უპირატესობით წარიმართა. "აცტეკები" თამაშს ნამდვილად აკონტროლებდნენ, თუმცა საქმე რეალურ საგოლე მომენტებამდე არ მიდიოდა. საწყისი 45 წუთიც ასეთი დუნე თამაშით დასრულდა.


    მეორე ნახევრის მთავარი ეპიზოდი 56-ე წუთზე დაფიქსირდა, როდესაც მექსიკის ნაკრების საჯარიმოში ექტორ მორენომ რობერტ ლევანდოვსკი წააქცია. ვიდეორეფერისთან კონსულტაციის შემდგომ მთავარმა მსაჯმა ხელი პენალტის ნიშნულისკენ გაიშვირა.


    თერთმეტმეტრიანი პოლონეთის ნაკრების მთავარმა ვარსკვლავმა რობერტ ლევანდოვსკიმ ძალიან ცუდად შეასრულა და ბურთი მექსიკის ნაკრების უცვლელმა კიპერმა გილერმო ოჩოამ მოიგერია. ოჩოას მსოფლიო ჩემპიონატებზე ასპარეზობა შესანიშნავად გამოსდის ხოლმე და წლევანდელი მუნდიალიც რომ გამონაკლისი არ იქნება, აქედანვე შევიტყვეთ.


    მატჩის ბოლომდე გუნდებმა რამდენიმე ნახევრადმომენტიც შექმნეს, თუმცა 100%-იანი შანსი არ გვინახავს. კატარის მუნდიალზე ზედიზედ მეორე უგოლო ფრე გათამაშდა, ეს კი ყველაზე მეტად არგენტინის ნაკრებს აწყობდა - საუდის არაბეთისგან გვემულ "ალბისელესტეს" ჯგუფის პირველობის რეალური შანსი ისევ გაუჩნდა.


    ამ ჯგუფში მეორე ტურის მატჩები 26 ნოემბერს გაიმართება. 17 საათზე ერთმანეთს საუდის არაბეთი და პოლონეთი შეერკინებიან, 23 საათიდან კი არგენტინისა და მექსიკის ეროვნულ ნაკრებთა ჯახი გველის.


    დოჰა. „სტადიუმ 974“. 39 369 მაყურებელი


    მექსიკა 0:0 პოლონეთი


    გამოუყენებელი პენალტი: ლევანდოვსკი (58)


    მექსიკა: ოჩოა - სანჩესი, მონტესი, მორენო, გალიარდო - ერერა (როდრიგესი 71), ალვარესი, ჩავესი - ლოსანო, მარტინი (ხიმენესი 71), ვეგა (84. ანტუნა).


    პოლონეთი: შჩესნი - ბერეშჩინსკი, გლიკი, კივიორი - კაში, კამინსკი, კრიხოვიაკი, შჩიმანსკი (72. ფრანკოვსკი), ჟალევსკი (46. ბიელიკი) - ჟელინსკი (87. მილიკი) - ლევანდოვსკი.

    Facebook კომენტარები