• 03-12-2022
    ბრაზილიას ჟესუსი და ტელეშიც დააკლდნენ
    ბრაზილიას ჟესუსი და ტელეშიც დააკლდნენ
    Aa

    კატარის მსოფლიო ჩემპიონატს ბრაზილიის ეროვნული ნაკრების კიდევ ორი ფეხბურთელი გამოაკლდა. დღეს გავრცელებული ინფორმაციის თანახმად, კატარულ მინდვრებზე ვეღარ ვიხილავთ ლონდონის "არსენალის" თავდამსხმელ გაბრიელ ჟესუსსა და "მანჩესტერ იუნაიტედიდან" "სევილიაში" განათხოვრებულ ალექს ტელეშს.


    ორივე ფეხბურთელმა ტრავმა ბრაზილიისა და კამერუნის გუშინდელ შეხვედრაში მიიღო. ტელეშს მოედნიდან გასვლა 54-ე წუთზე მოუწია, გაბი კი მას 10 წუთში მიჰყვა.


    "ალექს ტელეშმა და გაბრიელ ჟესუსმა შაბათ დილით გამოკვლევები ჩაიტარეს, ბრაზილიის გუნდის ექიმის, როდრიგო ლამარის ზედამხედველობით. მათ მარჯვენა მუხლზე გადაღებულმა MRI-მ დაადასტურა, რომ შეუძლებელია, ისინი ფიფას მსოფლიო ჩემპიონატის დასრულებამდე გამოჯანმრთელდნენ," - ვკითხულობთ ბრაზილიის ფეხბურთის ფედერაციის მიერ გავრცელებულ განცხადებაში.


    შეგახსენებთ, რომ "პენტაკამპეონებს" ტრავმებმა პრობლემები აქამდეც შეუქმნეს. ჯგუფური ეტაპის ბოლო ორი მატჩი გამოტოვა და მერვედფინალშიც ვერ ითამაშებს ნეიმარ ჟუნიორი, ხოლო ალექს სანდროსა და დანილოს ბედი ჯერ კიდევ გაურკვეველია.


    თუ ფლანგის მცველებმა დაბრუნება ვერ მოასწრეს, მერვედფინალში მარჯვენა ფლანგი შეიძლება 39 წლის დანი ალვეშმა ჩაიბაროს. არ გამოვრიცხოთ, რომ მარჯვენა მცველად ტიტემ მადრიდის "რეალის" უკანახაზელი, ედერ მილიტაო დააყენოს. შვეიცარიასთან მატჩში სწორედ ასეთი სურათი ვიხილეთ.


    ცნობისთვის, მერვედფინალში "სელესაო" სამხრეთ კორეას შეხვდება. მატჩი 5 დეკემბერს, თბილისის დროით 23 საათზე დაიწყება.

    Facebook კომენტარები