როგორც მოგეხსენებათ, ფრანგული "მეცისა" და საქართველოს ნაკრების ცენტრფორვარდს, გიორგი მიქაუტაძეს ევროპის მასშტაბით უამრავი მსურველი ჰყავს.

DiariodeCadiz-ს თუ დავუჯერებთ, მიქაუტაძის მსურველთა სიას კიდევ ერთი კლუბი შეუერთდა. საუბარია ესპანურ "კადისზე". ეს პირველი ესპანური გუნდია, რომელიც 22 წლის ფეხბურთელს დაუკავშირეს.

წყაროს თანახმად, კადისელებმა გიორგიზე ინფორმაცია მოაგროვეს, ფასის გაგების შემდეგ კი მათი ინტერესი მცირედით შენელდა, მაგრამ როგორც DiariodeCadiz-ი აღნიშნავს, სატრანსფერო ფანჯარა 31 აგვისტომდე ღიაა, იქამდე კი ყველაფერი შეიძლება მოხდეს.

შეგახსენებთ, რომ ქართველ თავდამსხმელს "მეცი" 20 მილიონ ევროდ აფასებს. "შინდისფრებმა" ინგლისური "ბარნლისა" და იტალიური "ლაციოს" 15-მილიონიანი შეთავაზებები უარით გაისტუმრეს.

ცხადია, ძალიან მცირეა იმის შანსი, რომ ფინანსურად არც ისე ძლიერმა "კადისმა" "მეცის" მოთხოვნის დაკმაყოფილება შეძლოს.

ახალი სეზონისთვის მიქაუტაძე სწორედ ფრანგულ გუნდთან ერთად ემზადება. 3 ამხანაგურ მატჩში მან 2 გოლითა და 1 ასისტით გამოიჩინა.