საქართველოს ნაკრების სასტარტო შემადგენლობა საბერძნეთთან გასამართ ფინალურ მატჩამდე ორიოდე საათით ადრე გვეცოდინება, თუმცა იქამდე არაფერი გვიშლის ხელს, რომ ძირითად თერთმეტეულზე ჩვენი წარმოდგენა შევიქმნათ.

ფეხბურთის ერთ-ერთი დაუწერელი კანონი, რომ გამარჯვებულ შემადგენლობას არ ცვლიან, ხვალ წესით უნდა დაირღვეს. ნაკრებს იტალიური "ნაპოლის" ვარსკვლავი და სერია ა-ს გასული სეზონის საუკეთესო ფეხბურთელი, ხვიჩა კვარაცხელია უბრუნდება. ცხადია, კვარას სათადარიგოთა სკამიდან არავინ დააწყებინებს. ერთადერთი შეკითხვა, რომელზეც პასუხია გასაცემი, ისაა, თუ ვის ჩაანაცვლებს "ჯვაროსანთა" შვიდიანი სასტარტოში - ბუდუ ზივზივაძეს თუ გიორგი მიქაუტაძეს. ბუდუს ზურგს ლუქსემბურგთან ნათამაშები სუპერმატჩი და ბოლო პერიოდის ბრწყინვალე ფორმა უმაგრებს, მიქაუტაძე კი კვარასთან წყვილში უფრო შეთამაშებულია. ნებისმიერ შემთხვევაში, სანიოლის მძიმე გადაწყვეტილების მიღება მოუწევს, თუმცა ჩვენ ვვარაუდობთ, სათადარიგოთა სკამიდან თამაშის გამძლიერებლის როლი მიქაუტაძეს დაეკისრება.

რაც შეეხება სხვა რგოლებს, მართალია, ფრანგმა სპეციალისტმა ლუქსემბურგთან შეხვედრის შემდეგ თქვა, რომ კვარას დაბრუნება შეიძლება ერთადერთი ცვლილება არ ყოფილიყო, მაგრამ ამგვარი მოლოდინი არ გვაქვს. ერთადერთი, რაც შეიძლება განხილული ყოფილიყო, სასტარტო თერთმეტეულში ჯაბა კანკავას განმწესებაა, ოღონდ ლუქსემბურგთან სამივე ნახევარმცველმა იმდენად კარგი შთაბეჭდილება დატოვა, რომ სანიოლისგან მსგავს ქმედებას ნაკლებად ველით.

საბოლოო ჯამში, დამოუკიდებელი ქართული ფეხბურთის ისტორიაში ჯერჯერობით ყველაზე მნიშვნელოვან მატჩს ეს თერთმეტი ფეხბურთელი დაიწყებს:

მეკარე: გიორგი მამარდაშვილი

დაცვა: ლაშა დვალი, გურამ კაშია, საბა კვირკველია

ნახევარდაცვა: ლევან შენგელია, ოთარ კიტეიშვილი, გიორგი ჩაკვეტაძე, გიორგი ქოჩორაშვილი, ოთარ კაკაბაძე

თავდასხმა: ბუდუ ზივზივაძე, ხვიჩა კვარაცხელია

აქვე შეგახსენებთ, რომ მატჩი "დინამო არენაზე" თბილისის დროით 21 საათიდან დაიწყება.