ევროპის 21-წლამდელთა ჩემპიონატზე გამოსვლა საქართველოს ნაკრებმა მეოთხედფინალურ ეტაპზე, ისრაელთან მარცხით დაასრულა, თუმცა ეს ტურნირი "ჯვაროსანთათვის" მაინც ისტორიული გამოდგა - დებიუტანტმა გუნდმა სიკვდილის ჯგუფიდან პირველი ადგილით გააღწია, ჩამოიტოვა რა პორტუგალიის, ბელგიისა და ნიდერლანდების ნაკრებები.

ისტორიული შედეგები დააფიქსირეს ქართველმა გულშემატკივრებმაც. ევროპის 21-წლამდელთა ჩემპიონატის კონკრეტულ მატჩს არასდროს დასწრებია იმდენი მაყურებელი, რამდენიც საქართველოსა და ისრაელის ჯახს დაესწრო. მოგეხსენებათ, რომ წინა ორი რეკორდიც "დინამო არენაზ" შეკრებილ პუბლიკას ეკუთვნოდა.

საუკეთესო ხუთეული დღეს ასე გამოიყურება:

1. საქართველო 0:0 ისრაელი (პენ: 3-4), თბილისი, "დინამო არენა", 2023 წელი – 44 338 მაყურებელი.

2. ნიდერლანდები 1:1 საქართველო, თბილისი, "დინამო არენა", 2023 წელი – 43 043 მაყურებელი.

3. საქართველო 2:2 ბელგია, თბილისი, "დინამო არენა", 2023 წელი – 41 887 მაყურებელი.

4. იტალია 1:1 ესპანეთი (პენ: 5-4), ბარსელონა, "მონტჟუიკი", 1996 წელი – 35 500 მაყურებელი.

5. საბერძნეთი 0:0 საფრანგეთი, პირეოსი, "კარაისკაკის სთედიუმი", 1986 წელი - 35 000 მაყურებელი.

ვახსენოთ ისიც, რომ ევრო 2021-ის შეხვედრებს ჯამში უკვე 250 746-მა მაყურებელმა მიადევნა თვალი სტადიონიდან (გუშინდელი მატჩების ჩათვლით) საქართველომ და რუმინეთმა გააუმჯობესეს პოლონელთა მიერ 2017 წელს ნაჩვენები შედეგი (243 995) და არ დაგვავიწყდეს, რომ მათ რიცხვს 5 მატჩის მონაცემები კიდევ უნდა მიემატოს.