ავტორიტეტული ბრიტანული გამოცემა Daily Mirror-ი იტყობინება, რომ "მანჩესტერ სიტის" ესპანელი სპეციალისტი ხოსეპ გვარდიოლა მიმდინარე სატრანსფერო ფანჯრის დასრულებამდე კიდევ 2 ტრანსფერის განხორციელებას გეგმავს, რითაც ყველა დროის სატრანსფერო რეკორდის დამხობას შეძლებს.

წყაროზე დაყრდნობით "ქალაქელების" თავკაცს, რომელსაც მიმდინარე ზაფხულში 210 მილიონი ევრო უკვე დახარჯული აქვს, სურს, რომ პრემიერ ლიგის კლუბებიდან ტოპ კლასის ფეხბურთელები დაიმატოს.

საქმე ეხება ლონდონის "არსენალის" ჩილელ შემტევ ალექსის სანჩესს და "ვესტ ბრომვიჩის" მცველ ჯონი ევანსს, რომელთა სატრანსფერო ღირებულება ჯამში 77 მილიონ ევროს უტოლდება. აქედან 70 მილიონი გვარდიოლა მზადაა "მეთოფეებს" გადაუხადოს სანჩესისთვის.

ამრიგად თუ გვარდიოლამ ხსენებული ფეხბურთელები შეიძინა, მაშინ ის 2009 წელს მადრიდის "რეალის" ყველა დროის სატრანსფერო რეკორდს დაამხობს, რომელიც 257.4 მილიონ ევროს უდრის.
ავტორი გიორგი კაპანაძე