La Gazzetta dello Sport იუწყება, რომ სიმონე ინძაგი მილანის "ინტერთან" კონტრაქტს გაახანგრძლივებს.

ახალი კონტრაქტის მიხედვით, იტალიელი სპეციალისტი "ნერაძურიში" 2025 წლის ივნისამდე დარჩება. ხელშეკრულება 1 წლით ხანგრძლივდება, რადგან მოქმედს ვადა 2024 წლის ივნისში ეწურებოდა.

სიმონეს მნიშვნელოვნად გაუზრდიან ხელფასსაც, რაც იმ შესანიშნავი შედეგების დამსახურებაა, რაც 47 წლის სპეციალისტმა კლუბის ფინანსური ძნელბედობის ჟამს აჩვენა.

"შავ-ლურჯების" მთავარი მწვრთნელის რანგში ინძაგის ასეთი სტატისტიკა აქვს: 69 გამარჯვება, 18 ფრე, 22 მარცხი. მისმა გუნდმა გაიტანა 207 და გაუშვა 100 გოლი.

ცხადია, გამოცდილი სპეციალისტის ყველაზე დიდ მიღწევად "ინტერნაციონალეს" ჩემპიონთა ლიგის ფინალში გაყვანა რჩება. გარდა ამისა, მან გუნდს იტალიის თასი და სუპერთასი 2-2-ჯერ მოაგებინა.