ნიდერლანდების ნაკრებმა, რომელიც ერთა ლიგის 2023 წლის ოთხთა ფინალს მასპინძლობდა, ტურნირი მედლის გარეშე დაამთავრა.
"ნარინჯისფრები" მესამე ადგილისთვის მატჩში დღეს იტალიის ეროვნულ გუნდს დაუპირისპირდნენ და მძიმე ბრძოლაში დამარცხდნენ, ანგარიშით 2:3.
"სკუადრა აძურამ" პირველი ტაიმი კომფორტული სხვაობით მოიგო. მე-6 წუთზე იტალიელები ფედერიკო დი მარკომ დააწინაურა, უპირატესობა ორამდე კი დავიდე ფრატეზიმ გაზარდა.
ნიდერლანდელები მეორე ნახევარში გაცილებით უკეთ გამოიყურებოდნენ. 1 ბურთი სტივენ ბერგვაინმა 68-ე წუთზე გაქვითა და გუნდი თამაშში დააბრუნა. მასპინძლების სიხარულმა დიდხანს ვერ გასტანა - 73-ე წუთზე ფედერიკო კიეზამ სტატუს ქუო აღადგინა.
ერთადერთი, რაც რონალდ კუმანის შეგირდებმა დარჩენილ დროში მოახერხეს, ჯორჯინიო ვეინალდუმის მიერ 89-ე წუთზე გატანილი გოლი გახლდათ.
ერთა ლიგის ზედიზედ მეორე სეზონია, რაც იტალიის ნაკრები ბრინჯაოს მედლებს იღებს. რაც შეეხებათ ნიდერლანდელებს, მათ აშკარად ცუდი პერიოდი უდგათ - კუმანის დაბრუნების შემდეგ ჩატარებულ 4 მატჩში "ნარინჯისფრები" 3-ჯერ დამარცხდნენ, ერთხელ კი გიბრალტარს აჯობეს.
ამ ტურნირის ფინალური ჯახი დღეს, თბილისის დროით 22:45 საათზე დაიწყება. ტრიუმფატორს ხორვატიისა და ესპანეთის ნაკრებები გაარკვევენ.