• 14-04-2022
    დავით მუჯირი: თავისი ბრძოლისუნარიანობით “თელავი” სულ მიზიდავდა
    დავით მუჯირი: თავისი ბრძოლისუნარიანობით “თელავი” სულ მიზიდავდა

    "თელავის" პრესსამსახურმა გუნდსი ახალწვეულ, დავით მუჯირთან საინტერესო ინტერვიუ ჩაწერა:

    – დავით, ცნობილი ბაბუის და მამის საქმის გამგრძელებელი ხართ, რაც დიდი პასუხისმგებლობაა...


    – გეთანხმებით. მართლაც, რომ დიდი პასუხისმგებლობაა ამ სახელის და გვარის ტარება. ყოველთვის ვცდილობ, როგორც მოედანზე, ისე მოედნის მიღმა ღირსეულად ვატარო


    – ბაბუა მცველი, მამა შემტევი, თქვენ თავდამსხმელი. პროფესია საკუთარი არჩევანი უფროა თუ ოჯახური ტრადიციის გაგრძელება?


    – ჩემთვის ფეხბურთელობა არავის დაუძალებია, პირიქით, სულ მეუბნებოდა მამა, რომ ცხოვრებაში მე რაც მინდოდა, ის მეკეთებინა ყოველთვის. მაგრამ ფეხბურთმა ადრეული ასაკიდანვე გამიტაცა და გადავწყვიტე, ბოლომდე გავყოლოდი


    – ახალგაზრდა ასაკში უცხოეთში თამაშიც მოასწარით. მოდით, სლოვაკურ "ზლატე მორავცეში" გატარებული პერიოდი გაიხსენეთ?


    – დიახ, ასეა. სლოვაკურ "ზლატე მორავცეში" შარშან ვთამაშობდი, სადაც მართალია, ბევრი სათამაშო დრო არ მქონდა, მაგრამ იქ წასვლას საერთოდ არ ვნანობ. სლოვაკეთში განვლილი პერიოდი განვითარებაში ძალიან დამეხმარა, რაც ვფიქრობ, ჩემი პროგრესის ნაწილია და ყველანაირად ვეცდები, უფრო მოვუმატო.


    – დაბრუნდით სამშობლოში და გადმოხვედით "თელავში". რატომ ჩვენი გუნდი?


    – სიმართლე გითხრათ, სულ მიზიდავდა "თელავი", თავისი ბრძოლისუნარიანობით. გუნდში მაგარი საფეხბურთო გარემოა და ძალიან კარგი ატმოსფეროა. სეზონის დაწყებამდე როდესაც გავიგე, რომ "თელავში" თამაშის ვარიანტი იყო, გადაწყვეტილება მაშინვე მივიღე, არც კი დავფიქრებულვარ.


    – გუნდმა ჩემპიონატი მშვენივრად დაიწყო, ბიჭებიც ერთმანეთის გვერდში ხართ, წინ გრძელი სეზონი და კიდევ არაერთი რთული მატჩია...


    – საწყისი ტურები ურიგოდ ნამდვილად არ გამოვიყურებოდით, თუმცა ეს მხოლოდ დასაწყისია, წინ მართლაც ბევრი თამაში გველოდება და ყველანაირად ვეცდებით, რაც შეიძლება ბევრი თამაში მოვიგოთ და თელაველი გულშემატკივარი გავახაროთ.


    შეგახსენებთ, რომ დავით მუჯირი "თელავს" სეზონის დასაწყისში "მორავცე-ვრაბლედან" შეუერთდა. ახალგაზრდა ფეხბურთელმა 6 ჩატარებულ შეხვედრაში 1 საგოლე გადაცემა შეასრულა.

    Facebook კომენტარები