წყალტუბოს “სამგურალისა” და საქართველოს 21-წლამდე ნაკრების მოთამაშემ, ნოდარ ლომინაძემ იმერული გუნდის პრესსამსახურთან ისაუბრა:

“ჩვენმა გუნდმა ევროპის 21 წლამდე ჩემპიონატზე პირველად იასპარეზა და ალბათ, ბევრი არ ელოდა, რომ ჯგუფიდან გავიდოდით. ძალიან რთული მეტოქეები გვყავდა, თითქმის ყველა ფავორიტმა ჩვენს ჯგუფში მოიყარა თავი. ვფიქრობ, ევროპის ჩემპიონატი საკმად კარგად ჩავატარეთ, მოვუგეთ პორტუგალიას, ფრე ვითამაშეთ ბელგიასთან და ჰოლანდიასთან. ჯგუფში პირველი ადგილი დავიკავეთ და ქართველ ქომაგს დიდი სიხარული მივანიჭრთ.

პირადად მე ასეთი ძლიერი ნაკრებების წინააღმდეგ თამაშმა დიდი გამოცდილება შემძინა. ვნახე თუ რაზე მაქვს სამუშაო.

პირველ რიგში, მინდა აღვნიშნო ხალხის დამოკიდებულება ჩვენს მიმართ.

მადლობა თითოეულ გულშემატკივარს ვინც კი  სტადიონზე მოვიდა, ან ტელეეკრანებიდან გვადევნება თვალს და გვგულშემატკივრობდა. სამწუხაროდ, ისრაელთან პენალტების სერიაში დავმარცხდით და ნახევარფინალამდე ერთი ნაბიჯი დაგვაკლდა... ყველაფერი ცუდად დამთავრდა, მაგრამ საბოლოო ჯამში მაინც ბედნიერი ვარ, რომ ამ დიდი მოვლენის მონაწილე ვიყავი".