• 23-04-2022
    "მე მაქსიმუმს გავაკეთებ, რომ არავის გავუცრუო იმედი" - ინტერვიუ გიორგი ხაბულიანთან
    "მე მაქსიმუმს გავაკეთებ, რომ არავის გავუცრუო იმედი" - ინტერვიუ გიორგი ხაბულიანთან

    "თელავში" იჯარის წესით 18 წლის ნიჭიერი ფეხბურთელი, გიორგი ხაბულიანი ასპრეზობს.


    გიორგი თურქული "ადანა დემირსპორის" საკუთრებაა, ახალგაზრდა ფეხბურთელი ზაფხულამდე "თელავს" დიდი მიზნების მიღწევაში დაეხმარება.


    ხაბულიანი ამავდროულად საქართველოს 19-წლამდე ნაკრების წევრიც გახლავთ. 18 წლის თავდამსხმელის კარიერის მიზანი ჩემპიონთა ლიგის მოგება და ეროვნული ნაკრების მაისურის მორგებაა.


    "ფუტბოლნიუსი" გიორგი ხაბულიანს დაუკავშირდა და მასთან მცირე ინტერვიუ ჩაწერა:


    – როგორ ფიზიკურ მდგომარეობაში იმყოფები და როგორ გრძნობ თავს?


    – დიდხნიანი უთამაშებლობის შემდეგ შევდივარ ფორმაში, მაქსიმუმს ვაკეთებ ვარჯიშებზე და იდეალურად ვგრძნობ თავს.


    – თელავში დაბრუნების მიზეზი რა იყო?


    – პირველ რიგში, გადავწყვიტე ჩემს ოჯახთან ერთად და ჩემს მენეჯერთან ერთად, რომ მჭირდებოდა მეტი სათამაშო დრო. სატრანსფერო ფანჯარა დახურული გახლდათ და მხოლოდ საქართველოში დაბრუნება და თამაში შემეძლო. მქონდა სხვა ვარიანტებიც საქართველოში, თუმცა თელავი ჩემთვის არის ოჯახი და ის გუნდი, რომელთან ერთადაც სულ ბედნიერი ვიქნები, რომ ვითამაშო.


    – როგორ შეაფასებდი თელავს მიმდინარე სეზონში და რა გეგმები გაქვთ?


    – მიმდინარე სეზონში ცხრილიდან გამომდინარე კარგად მიდის ყველაფერი. ბიჭებიც თავს კარგად გრძნობენ. რაც შეეხება გეგმებს, რა თქმა უნდა ჩვენი მიზანი სამეულში შესვლა არის და ჩემი აზრით დიდი შანსი გვაქვს და მგონია, რომ სამეულში მოვხვდებით სეზონის ბოლოს.


    – გიორგი ჭელიძეს როგორ დაახასიათებდი?


    – გიორგი ჭელიძესთან მუშაობით ძალიან მოხარული ვარ. დადებითის და კარგის გარდა, როგორც პიროვნულად, ასევე მწვრთნელის რანგში არაფრის თქმა არ შემიძლია.


    – ადანა დემირსპორში პირველ გუნდში თამაში რატომ ვერ მოახერხე?


    – ადანა დემირსპორში ჩემი დებიუტი ვერ შედგა ასაკიდან გამომდინარე. უეფა არ აძლევს უფლებას საქართველოს მოქალაქეებს უცხოეთში თამაშის უფლებას 18 წლამდე. 18 წლის უკვე გავხდი და ზაფხულიდან შემიძლია თამაში.


    – შენს მიერ ჩატარებულ სადებიუტო სეზონს როგორ შეაფასებდი ეროვნულ ლიგაში?


    – ჩემი სადებიუტო სეზონი იყო რა თქმა უნდა დიდი გამოცდილება. 16 წლის ასაკში მქონდა სადებიუტო მატჩი ეროვნულ ლიგაში. რა თქმა უნდა თავიდან გამიჭირდა, მაგრამ თამაშების და ვარჯიშების შემდეგ შევეგუე და ჩემი კარიერის ერთ-ერთი საუკეთესო ეტაპი გავიარე.


    – საქართველოს 19-წლამდე ნაკრების ერთ-ერთი გამორჩეული წევრი ხარ, როგორ ფიქრობ რა დაგაკლდათ ევროპის ჩემპიონატზე გასასვლელად?


    – დაგვაკლდა ფეხბურთელები და ჩემი აზრით არ გაგვიმართლა, რადგან ბიჭები ყველა მაქსიმალურად მზად ვიყავით, ყველაფერი ჩავდეთ ჩვენი მაქსიმუმი გავაკეთეთ. ცოტა უიღბლობა, ფეხბურთელების ნაკლები სათამაშო დრო. როგორც მოგეხსენებათ უმეტესობა მოთამაშეების ეროვნული ლიგის გუნდებში ასპარეზობენ და ნაკლები სათამაშო დრო ეძლევათ. ჩვენ მაქსიმუმი ვაჩვენეთ მოედანზე, თუმცა უიღბლობისა და ფეხბურთელების გამოკლების გამო ფინალურ ეტაპზე გასვლა ვერ მოვახერხეთ.


    – რა იქნება შენი მთავარი მიზანი მიმდინარე სეზონში?


    – ჩემი მთავარი მიზანი მიმდინარე სეზონში არის წარმატება თელავთან ერთად და ასევე ბევრი გოლის გატანა.


    – რა გეგმები გაქვს სეზონის დასრულების შემდეგ? აპირებ თურქეთში დაბრუნებას, სხვა შემოთავაზებებს თუ განიხილავ?


    – სავარაუდოდ ზაფხულის სატრანსფერო ფანჯარაზე ადანა დემირსპორში დავბრუნდები.


    – რა გაძლევს მოტივაციას?


    – პირველ რიგში მოტივაციას ჩემი ოჯახი მაძლევს, ჩემი საახლობლო წრე, რომელსაც ჩემი დიდი იმედი აქვს, მგულშემატკივრობენ და ჩემს გვერდით არიან. მე მაქსიმუმს გავაკეთებ, რომ არავის გავუცრუო იმედი.


    – შენი ოცნების გუნდი?


    – ჩემი ოცნების გუნდი ტურინის “იუვენტუსი” გახლავთ.


    – რა არის შენი კარიერის მიზანი?


    – ჩემი კარიერის მიზანი არის ჩემპიონთა ლიგის მოგება და რა თქმა უნდა ეროვნულ ნაკრებში თამაში.

    Facebook კომენტარები
    მეტი სიახლის ნახვა