როგორც მოგეხსენებათ, საქართველოს ნაკრების ცენტრალური მცველი, საბა საზანოვი კარიერას სერია ა- კლუბ "ტორინოში" გააგრძელებს.

ტურინელებმა მოსკოვის "დინამოს" ახალგაზრდა უკანახაზელის სანაცვლოდ 3 მილიონი ევრო გადაუხადეს. გარიგებაში ასევე ჩაიდო ასპარეზობასთან დაკავშირებული ბონუსები და რუსული კლუბი საზანოვის მომდევნო ტრანსფერიდანაც მიიღებს წილს. საბა იტალიაში დღეს გაფრინდა და მალე სამედიცინო შემოწმებასაც გაივლის.

21 წლის ფეხბურთელის შესახებ დღეს Tuttosport-მა დაწერა.

იტალიური გამოცემა აღნიშნავს, რომ "ტორინოს" ხვიჩა კვარაცხელიას თანამემამულე უერთდება, რომელიც "უდინეზეს" სამიზნე გახლდათ, თუმცა სატრანსფერო ბრძოლა "ხარებმა" მოიგეს. სხვათა შორის, Tuttosport საზანოვის ახალ მეტსახელს, "ტოროსაც" გვთავაზობს.

სტატიაში ვკითხულობთ, რომ იტალიური კლუბები "რომას" ყოფილი და "ლილის" მოქმედი თავკაცის, პაოლო ფონსეკას რჩევას მისდევდნენ და რუსეთის ჩემპიონატიდან ფეხბურთელების შეძენას ერიდებოდნენ, მაგრამ ტურინელებმა ამ ჯერზე გამონაკლისი დაუშვეს.