დორტმუნდის "ბორუსია" ახალ სეზონს მძიმედ იწყებს. "შავ-ყვითლებს" ბუნდესლიგის 3 ტურში უკვე 4 ქულა აქვთ დაკარგული და სატურნირო ცხრილის მე-9 პოზიციას იკავებენ.

განსაკუთრებით დასანანი გასულ უქმეებზე გამართული მატჩის შედეგი გახლდათ. "ზიგნალ იდუნა პარკზე" მასპინძლები ელიტაში ახლახანს აღზევებულ "ჰაიდენჰაიმს" ორბურთიანი სხვაობით უგებდნენ, მაგრამ შეხვედრა ფრედ, ანგარიშით 2:2 დასრულდა.

მიუხედავად ამ ყველაფრისა, "ბორუსიას" ახალწვეული, ნიკლას ფიულკრუგი არ მიიჩნევს, რომ მისი გუნდი კრიზისშია.

"ჩემთვის, ეს კრიზისი არ არის. ჩვენ ჯერ კიდევ დაუმარცხებლები ვართ. სეზონის განმავლობაში რამდენჯერმე ხდება, როცა გუნდს მცირე პრობლემა ექმნება. ახლა სწორედ ერთ-ერთი ასეთი ეპიზოდია. 

"ბორუსიასთვის" მნიშვნელოვანია, რომ სწორ გზაზე დაბრუნდეს და დამაჯერებელი მატჩები ჩაატაროს. გუნდში საოცრად დიდი ტალანტია თავმოყრილი. ამიტომაცაა, რომ არ ვნერვიულობ," - თქვა ფიულკრუგმა.

შეგახსენებთ, რომ გერმანელი თავდამსხმელი "შავ-ყვითლებმა" სატრანსფერო ფანჯრის ბოლო დღეებში შეიძინეს "ვოლფსბურგიდან". ახალ გუნდში დებიუტი მას სწორედ "ჰაიდენჰაიმთან" შეხვედრაში ჰქონდა.