• 07-10-2023
    ვან დე ვენი: "სონმა მითხრა, რომ დღეს პირველ გოლს გავიტანდი"
    ვან დე ვენი: "სონმა მითხრა, რომ დღეს პირველ გოლს გავიტანდი"

    ლონდონის "ტოტენჰემი" პრემიერ ლიგაში ბრწყინვალე გამოსვლას აგრძელებს. "დეზებმა" დღეს "ლუთონთან" ითამაშეს და მიუხედავად იმისა, რომ მეორე ტაიმის კაცნაკლულად ჩატარება მოუწიათ (ივ ბისუმამ წითელი ბარათი მიიღო), შინ მაინც 3 ქულით დაბრუნდნენ.

    შეხვედრის ერთადერთი გოლი "სპურსის" ნიდერლანდელმა მცველმა, მიკი ვან დე ვენმა გაიტანა. "დეზების" ახალწვეულმა თავი 52-ე წუთზე, ჯეიმს მედისონის შესანიშნავი პასის შემდეგ გამოიჩინა.

    ვან დე ვენის მატჩისშემდგომი კომენტარიდან გაირკვა, რომ მისი დღევანდელი გოლი ჰონ მინ სონმა იწინასწარმეტყველა.

    "გასაოცარი მატჩი! ვფიქრობ, მაგარი ხასიათი ვაჩვენეთ და ძალიან ბედნიერი ვარ, რომ პრემიერ ლიგასა და "ტოტენჰემში" ჩემი პირველი გოლი გავიტანე. მშრალად შენახული კარიც მცველებისთვის დიდი ჯილდოა.

    ვიცი, რომ მედისონს ფლანგიდან ცენტრში შეტეხვა უყვარს ხოლმე, ამიტომ სწორედ ამას დაველოდე. ჯეიმსის ბრწყინვალე პასს მარცხენა ფეხი დავუხვედრე და ბურთიც კარის ბადეში გაეხვა. შესანიშნავი შეგრძნება იყო.

    სასაცილო ისაა, რომ როდესაც ავტობუსში ვიყავით, სონმა მითხრა: "დღეს შენ პირველ გოლს გაგატანინებთ!" მაშინ ვთქვი, ვინ იცის-მეთქი, საბოლოო ჯამში კი, გოლი მართლაც გავიდა. იდეალური დღე გამოვიდა," - თქვა ვან დე ვეენმა.

    "ტოტენჰემმა" პრემიერ ლიგის სატურნირო ცხრილში პირველ ადგილზე გადაინაცვლა. იმ შემთხვევაში, თუ "მანჩესტერ სიტისა" და "არსენალს" შორის ხვალ გასამართი შეხვედრა ფრედ დასრულდა, ენჯ პოსტეკოგლუს გუნდი ერთპიროვნულ ლიდერობას შეინარჩუნებს.

    აქვე გეტყვით, რომ 22 წლის ვან დე ვენი "სპურსმა" გასული ზაფხულის სატრანსფერო ფანჯარაზე, "ვოლფსბურგიდან" შეიძინა.

    Facebook კომენტარები