– ლაშა, პირველ რიგში თქვენი ჯანმრთელობის შესახებ რომ გვითხრათ?
– თავს კარგად ვგრძნობ, არაფერი არ მაწუხებს. გავიარე სამედიცინო შემოწმება და ყველაფერი რიგზეა. უბრალოდ, გუნდთან ერთად ივნისის შემდეგ არ მივარჯიშია, მაგრამ ახლა საქართველოს პირველობაზე გამოცხადებული სანაკრებო პაუზა, დამეხმარება ფორმის აღდგენაში.
პირველი ვარჯიში გამართეთ “საბურთალოში”. როგორია თქვენი შთაბეჭდილებები?
– ფეხბურთელების დიდ ნაწილს ვიცნობ, ადაპტაცია არ უნდა გამიჭირდეს. მეგობრული გუნდია, შთაბეჭდილებები დადებითი და სასიამოვნოა.
როგორ მოხდა “საბურთალოსთან” დაკავშირება?
– დანიიდან წამოსვლის შემდეგ, მოლოდინის რეჟიმში ვიყავი… ჩემი ბავშვობის გუნდელმა, რომელთან ერთადაც “საბურთალოს” აკადემიაში ვთამაშობდი, შემომთავაზა ეს წინადადება. ჩემსა და კლუბის ხელმძღვანელებს შორის მოხდა შეხვედრა, რომელიც დადებითად დასრულდა. არ გამჭირვებია გადაწყვეტილების მიღება, რადგან კარგად ვიცნობ აქ მომუშავე ადამიანებსა და კლუბის ხელმძღვანელებს. მიყვარს აქაურობა, ამ ფაქტმა დიდი როლი ითამაშა ჩემს არჩევანზე.
– “საბურთალოს” თამაშებს თუ ადევნებთ თვალს და როგორია თქვენი შეხედულება?
– “საბურთალო” ახალგაზრდული გუნდია, სადაც ნიჭიერი ფეხბურთელები თამაშობენ. ამ გუნდს ბევრი რამის გაკეთება შეუძლია, ანგარიშგასაწევი კლუბია. ეს ყველაფერი ევროტურნირებზეც გამოჩნდა, სადაც გუნდმა გააზრებული, შემტევი და საინტერესო ფეხბურთი ითამაშა.
– ბავშვობის გარკვეული დრო “საბურთალოს” აკადემიაში გაატარეთ. გაიხსენეთ ის დრო და თაობა?
– ძალიან კარგი და წარმატებული წლები გავატარე “საბურთალოს” აკადემიაში. ბავშვობაში გატარებული დრო სხვანაირად გახსენდება. აქ ჩამოვყალიბდი ფეხბურთელად და ბევრი რამ ვისწავლე. “საბურთალოს” მიმართ მადლობის მეტი არაფერი მეთქმის. რაც შეეხება ჩვენს თაობას – “საბურთალოში” კარგი კონტიგენტი ვიყავით თავმოყრილი – ვაკო ყაზაიშვილი, დათი ხოჭოლავა, არჩილ ტვილდიანი, გიორგი ჭანტურია…
– დანიაში ექვსი წელი დაყავით…
– დანიაც კარგად გასახსენებელია. სკანდინავიაში ყველაზე კარგი სეზონი მქონდა მაშინ, როდესაც “ესბიერგი” მესამე ადგილზე გავიდა. ისეთი პატარა გუნდისთვის, როგორიც “ესბიერგია”, დიდი მიღწევა იყო. ამ სეზონში გუნდის საუკეთესო ფეხბურთელის პრიზი გადმომცეს და როგორც ლეგიონერს, კლუბში ყველაზე მეტი თამაში დამიგროვდა –  153 მატჩი.
– რას აქცევენ დანიელები ყურადღებას და როგორი ფეხბურთის თამაში უყვართ სკანდინავიაში?
– არა აქვს მნიშვნელობა, როგორი სტილის გუნდები თამაშობენ, ყოველთვის მაღალი ტემპია. უყვართ სწრაფი ფეხბურთის თამაში და ბევრი კლუბი კონტრშეტევაზე აგებს თამაშს.
– საქართველოს ნაკრების კანდიდატი ხართ. თავისთავად, გექნებათ მომავალში ნაკრების თამაშის სურვილი. რას იტყვით ნაკრების ამჟამინდელ გუნდზე? 
– ძალიან კარგი თაობა მოდის, ეს ბოლო მატჩებმაც გვაჩვენა. ლამაზ სანახაობასთან ერთად, შედეგიც არის, რაც ორმაგად სასიამოვნოა. ნაკრები კარგ ფორმაშია, თამაშიდან თამაშამდე უმატებს, პროგრესი აშკარად შეიმჩნევა. მჯერა, რომ ერთთა ლიგიდან გავალთ და მოვხვდებით ჯგუფში.

ცნობისთვის, ლაშა პარუნაშვილს საქართველოს ნაკრებში გამოცდილებაც აქვს.