• 18-11-2022
    გიორგი გოჩოლეიშვილი: “ჩემს კარიერაში ეს დიდი გამოწვევა იყო”
    გიორგი გოჩოლეიშვილი: “ჩემს კარიერაში ეს დიდი გამოწვევა იყო”
    Aa

    როგორც მოგეხსენებათ, "საბურთალოს" ახალგაზრდა მოთამაშემ, გიორგი გოჩოლეიშვილმა მაროკოს წინააღმდეგ საქართველოს ნაკრებში სადებიუტო შეხვედრა ჩაატარა.


    "საბურთალოს" პრესსამსახურმა ახლაგაზრდა ფეხბურთელთან საინტერესო ინტერვიუ ჩაწერა:


    – ყველა დადებითად და თბილად შემხვდა, რამაც გამიადვილა ადაპტაცია. რამდენიმეს ახალგაზრდული ნაკრებიდან ვიცნობდი, გამოცდილი და სტაჟიანი ფეხბურთელების უმეტესობა კი ახლა გავიცანი. მეგობრული და კარგი გარემო დამხვდა, რაც ძალიან მნიშვნელოვანია წარმატების მისაღწევად. მადლობა ყველას, ვინც გვერდში დამიდგა.


    – რომ მიხვედით ნაკრებში, მთავარმა მწვრთნელმა ვილი სანიოლიმ რა გითხრათ?


    პირველ რიგში მომილოცა ნაკრებში გამოძახება და წარმატებები მისურვა. ამის შემდეგ, როდესაც თეორიაზე ვიყავით, მითხრა, რომ თუ მომეცემოდა თამაშის საშუალება, მაქსიმალურად თავისუფლად ვყოფილიყავი. მისმა ამ სიტყვებმა მეტი შემართება მომცა.


    – დებიუტი გქონდათ ქვეყნის პირველ გუნდში. ელოდით, რომ ძირითად შემადგენლობაში ითამაშებდით?


    ძირითადში თამაშს არ ველოდი. უბრალოდ, თამაშის წინა დღეს ვარჯიშზე მკითხა, თუ როგორ ვგრძნობდი თავს. მეორე დღეს კი, როდესაც გავიგე, რომ ძირითად შემადგენლობაში დავიწყებდი მატჩს, უბედნიერესი ადამიანი ვიყავი. თამაში მოულოდნელი იყო, ერთგვარი სურპრიზი იყო. მატჩისწინა თავისებური მღელვარება იყო, მაგრამ შემდეგ გამიარა ამ მცირე ნერვიულობამ და განვაგრძე თამაში ჩემი ქვეყნისთვის.


    –  სხვა ტემპი და სისწრაფეები იყო, ბევრად გამოცდილი ფეხბურთელების წინაშე მოგიწიათ თამაში. ხომ არ გაგიჭირდათ?


    ჩემს კარიერაში ეს დიდი გამოწვევა იყო. ამ ერთმა მატჩმაც დიდი გამოცდილება შემმატა. რა თქმა უნდა, სხვა დონეზე თამაში იყო გამოცდილ და მაღალკვალიფიციურ ფეხბურთელებთან.


    – ნაკრებში რა მოგხვდათ თვალში განსაკუთრებით?


    ფეხბურთელები, მწვრთნელები თუ ნაკრების წევრები გვერდში მედგნენ. ამან კიდევ უფრო გამიმარტივა თამაში. გუნდი აშკარად ერთ მუშტად არის შეკრული და დიდი ოჯახია.


    – რას იტყვი ნაკრების კაპიტან გურამ კაშიაზე?


    ის გუნდის ლიდერია, რომელსაც ზურგს დიდი გამოცდილება უმაგრებს. მან მესაუბრა, გამიზიარა გამოცდილება, დამამშვიდა და მითხრა, რომ ყველაფერი კარგად იქნებოდა.

    Facebook კომენტარები