"პარი სენ ჟერმენის" ფრანგმა მეგავარსკვლავმა, კილიან მბაპემ "რეალ სოსიედადს" გასვლაზე დუბლი შეუსრულა და თავისი გუნდი ჩემპიონთა ლიგის მეოთხედფინალში გაიყვანა.

კილიანს უკანასკნელ კვირებში რთული პერიოდი ჰქონდა, რადგან ლუის ენრიკემ იგი ლიგა ერთის ზედიზედ ორი მატჩის მიმდინარეობისას შეცვალა. ლუჩოს ეს გუშინ არ გაუკეთებია, რაზეც მბაპეს ჰკითხეს, ესპანელ სპეციალისტს თავისი თამაშით ხომ არ გასცა პასუხი.

"ჩემი პასუხი მინდორზე? არა. ვინმესთვის გამიზნული შეტყობინება არ მაქვს. ჩემპიონთა ლიგაზე თამაში კიდევ მინდა. ეს მნიშვნელოვანი ტურნირია, მაგრამ არასდროს ვიქნები ფეხბურთელი, რომელიც იმალება.

მოგვარებულია თუ არა ყველაფერი ლუის ენრიკესთან? ლუის ენრიკესთან პრობლემა არ მაქვს, მიუხედავად იმისა, ეს ხალხს სჯერა თუ არა. პრობლემები მრავლად მაქვს, მაგრამ მწვრთნელი მათში არ შედის," - განაცხადა მბაპემ.

პარიზელებს შინ ორბურთიანი სხვაობით ჰქონდათ მოგებული, მბაპეს გუშინდელი ბენეფისით კი ორი მატჩის ჯამში 4:1 დააფიქსირეს.

კილიანმა ჩემპიონთა ლიგაზე თავისი 45-ე გოლი გაიტანა. ცნობისთვის, უკვე გადაწყვეტილია, რომ "პსჟ-ში" იგი თავის უკანასკნელ სეზონს ატარებს. უდიდესი ალბათობით, მბაპე ზაფხულში მადრიდის "რეალს" მიაშურებს.