სამწუხარო ამბავი - რა ინფორმაცია გავრცელდა ბუდუ ზივზივაძეზე

ჰაიდენჰაიმი, რომელიც სეზონის დასაწყისში საკმაოდ გაურკვევლად გამოიყურებოდა, როგორც იქნა, ფორმაში შევიდა.

გუნდი ბოლო სამ შეხვედრაში დაუმარცხებელია – ორი გამარჯვება და ერთი ფრე. განსაკუთრებით გამოსარჩევია ბუდუ ზივზივაძის თამაში, რომელმაც ამ პერიოდის განმავლობაში ორი გოლი გაიტანა და ერთი საგოლე გადაცემა შეასრულა. თუმცა, სამწუხაროდ, ქართველ ფორვარდს ვოლფსბურგთან გამართულ შეხვედრაში ტრავმა შეემთხვა.

გერმანული წყაროების ინფორმაციით, ზივზივაძემ კოჭის იოგი დაიზიანა, რის გამოც მინიმუმ ორ კვირას იუქმებს. ეს ნიშნავს, რომ ჰაიდენჰაიმი ლევერკუზენთან (6 აპრილს) და აინტრახტთან (13 აპრილს) გამართულ მატჩებში ბუდუს გარეშე იასპარეზებს.

ზივზივაძის არყოფნა ჰაიდენჰაიმისთვის სერიოზული დარტყმაა, განსაკუთრებით იმ ფონზე, რომ გუნდი გადათამაშების ზონაში (16-ე ადგილი) ქართველი ფორვარდის კარგი ფორმის წყალობით ავიდა.

ამ ორი უმძიმესი მატჩის შემდეგ, ჰაიდენჰაიმს ბაიერნთან შეხვედრა ელის (19 აპრილს), სადაც, დიდი ალბათობით, ბუდუ მწყობრში იქნება.