უდიდესი აღიარება - ესპანეთში გიორგი მიქაუტაძე სერიოზულად დააფასეს და ტიტულის მოგების შანსი გაუჩნდა

საქართველოს ნაკრებისა და ვილიარეალის ფორვარდი გიორგი მიქაუტაძე ესპანური ლა ლიგის თებერვლის საუკეთესო ფეხბურთელის წოდებისთვის იბრძვის. ის იმ ხუთ მოთამაშეს შორის მოხვდა, რომელთაგან საუკეთესო გამოკითხვის შედეგად უნდა გაირკვეს.

25 წლის მიქაუტაძე მიმდინარე თვეში მართლაც გამორჩეულად თამაშობს. გიორგიმ 9 თებერვალს ესპანიოლის (4:1) კარი დალაშქრა, 14-ში ხეტაფეს (1:2) გაუტანა, გუშინ კი ლევანტესთან გამარჯვების (1:0) მომტანი გოლი შეაგდო.

ქართველმა თავდამსხმელმა ლა ლიგაში მე-8 გოლი გაიტანა, აქედან 5 ამ წელს და ამასთან, როგორც აღვნიშნეთ, ზედიზედ მესამე ტურში. მის ანგარიშზე ასევე 4 საგოლე პასია.

მიმდინარე სეზონში ვილიარეალის მაისურით ყველა ტურნირზე გიორგის უკვე 10 გოლი აქვს 29 მატჩში (1 თასზე, 1 ჩემპიონთა ლიგაზე), ერთი გოლიც მან ლიონის მაისურით ლიგა 1-ში შეაგდო. 

მიქაუტაძის გარდა, თებერვლის საუკეთესო ფეხბურთელის ტიტულზე პრეტენზიას აბდესამად ეზალზული (ბეტისი), ტომას ლემარი (ჟირონა), ლუის მილა (ხეტაფე) და ფედერიკო ვალვერდე (რეალი) აცხადებენ.