• 01-12-2022
    D ჯგუფი: არგენტინა პირველია, საფრანგეთს პოლონეთი შეხვდება
    D ჯგუფი: არგენტინა პირველია, საფრანგეთს პოლონეთი შეხვდება
    Aa

    დასასრულს უახლოვდება მსოფლიო ჩემპიონატის ჯგუფური ეტაპი. რამდენიმე წუთის წინ ჩვენ რიგით მეშვიდე და მერვე მერვედფინალისტები გავარკვიეთ. პლეი ოფში ასპარეზობას არგენტინისა და პოლონეთის ეროვნული ნაკრებები გააგრძელებენ.


    "ალბისელესტემ" მომდევნო ეტაპის საგზური სწორედ პოლონეთის დამარცხებით მოიპოვა. ლიონელ სკალონის შეგირდებმა აღმოსავლეთ ევროპელებს მეორე ტაიმში მოუმთავრეს საქმე - გოლები ალექს მაკალისტერმა და ხულიან ალვარესმა გაიტანეს. კარგი თამაში ჰქონდა ლიონელ მესისაც, თუმცა ვერცხლისქვეყნელთა კაპიტანი კინაღამ მატჩის ანტიგმირად მოგვევლინა, რადგან შეხვედრის პირველ ტაიმში პენალტი გააფუჭა. ლეოს შესრულებული თერთმეტმეტრიანი ვოიცეხ შჩესნიმ ულამაზეს სტილში მოიგერია.


    არგენტინის ეროვნულმა გუნდმა C ჯგუფში ასპარეზობა 6 ქულით დაასრულა. ტურნირის ერთ-ერთ ფავორიტად მიჩნეული ნაკრები პირველ ადგილზე გავიდა და მერვედფინალში ავსტრალიას დაუპირისპირდება. ეს მატჩი 3 დეკემბერს, თბილისის დროით 23 საათზე დაიწყება. რაც შეეხებათ პოლონელებს, მათ 4 ქულა ჯგუფში მეორე პოზიციისა და მერვედფინალში საფრანგეთის ნაკრებთან თამაშის შანსის მისაღებად ეყოთ. აღნიშნული შეხვედრა კი 4 დეკემბერს, ჩვენი დროით 19 საათიდან აიღებს სტარტს.


    პარალელურად მიმდინარე მატჩში მექსიკამ საუდის არაბეთს მოუგო, ანგარიშით 2:0. "აცტეკებს" შემდეგ ეტაპზე გასასვლელად აუცილებლად უნდა მოეგოთ და თანაც, რაც შეიძლება დიდი ანგარიშით. ლათინოამერიკელებმა საქმეს თავიდანვე მოჰკიდეს ხელი, თუმცა მათი აქტიურობა გოლში მხოლოდ 47-ე წუთზე აისახა, როცა ჰენრი მარტინმა სეზარ მონტესის გადაცემით ისარგებლა. აქედან 5 წუთში ლუის ჩავეზმა საჯარიმო დარტყმით ულამაზესი გოლი შეაგდო და გუნდი ორბურთიანი სხვაობით დააწინაურა.


    ჩავეზის გოლის შემდეგ, ჯგუფში შეიქმნა ისეთი ვითარება, სადაც მექსიკასაც და პოლონეთს ჰქონდათ თანაბარი რაოდენობის ქულები, თანაბარი რაოდენობის გატანილი და თანაბარი რაოდენობის გაშვებული გოლები. ამ შემთხვევაში, მეორეადგილოსნის ვინაობა ყვითელ-წითელი ბარათების რაოდენობას უნდა გადაეწყვიტა. აქ კი პოლონელთა უპირატესობა აშკარად გახლდათ.


    სწორედ ამიტომ, მექსიკა მთელი გუნდით წავიდა მესამე გოლის გასატანად, მაგრამ საუდელთა მეკარემ, მუჰამედ ალ-ოვაისმა მათ ამის საშუალება არ მისცა. ის კი არა, არაბებმა მეტოქე კონტრშეტევაზეც დაიჭირეს და მათი მერვედფინალში გასვლის ოცნებას წერტილი დაუსვეს - დამატებული დროის მე-5 წუთზე სალემ ალ-დაუსარმა გაიტანა.


    ასე და ამგვარად, მექსიკას 4 ქულა ჯგუფში მხოლოდ მესამე ადგილის ასაღებად ეყო, საუდის არაბეთი კი ტურნირს 3 ქულით, თუმცა ისტორიული 3 ქულით ემშვიდობება.

    Facebook კომენტარები