"ნაპოლისა" და "ატალანტას" შორის გუშინ გამართული მატჩი უიღბლო გამოდგა კიმ მინ ჟაესთვის. "პარტენოპეის" სამხრეთ კორეელ უკანახაზელს მოედნის დატოვება ტრავმის გამო მოუხდა. 76-ე წუთზე იგი ჟოან ჟესუსმა შეცვალა.

ცენტრალური მცველის ჯანმრთელობის მდგომარეობაზე დღეს Corriere dello Sport-მა დაწერა.

იტალიური გამოცემის თანახმად, კიმს დეტალური სამედიცინო შემოწმება ჩაუტარდება. სწორედ ამის შემდეგ გავიგებთ, მზად იქნება თუ არა იგი ფრანკფურტის "აინტრახტთან" თამაშისთვის.

წინასწარი ვარაუდით, კორეელი ჩემპიონთა ლიგის მერვედფინალური ეტაპის საპასუხო შეხვედრისთვის გამოჯანმრთელებას მაინც მოასწრებს. იმავეს ვერ ვიტყვით "ნაპოლის" გოლკიპერ ალექს მერეტზე. სავარაუდოდ, მას ისევ პიერლუიჯი გოლინი შეცვლის.

შეგახსენებთ, რომ ფრანკფურტში გამართული მატჩი "ნაპოლიმ" დამაჯერებლად, ანგარიშით 2:0 მოიგო. განმეორებითი ჯახი ოთხშაბათს, თბილისის დროით 23:55 საათზე დაიწყება.