• 20-04-2022
    "ნაპოლი" ხვიჩას ადგილს უთავისუფლებს - ვის უშვებენ ნეაპოლიდან
    "ნაპოლი" ხვიჩას ადგილს უთავისუფლებს - ვის უშვებენ ნეაპოლიდან

    როგორც მოგეხსენებათ, ბათუმის "დინამოს" 21 წლის გარემარბის, ხვიჩა კვარაცხელიას იტალიურ "ნაპოლიში" ტრანსფერი თითქმის გადაწყვეტილი გახლავთ.


    კვარას ნეაპოლური მომავლის შესახებ უკვე დაწერეს ისეთმა ცნობილმა ჟურნალისტებმა, როგორებიც ჯანლუკა დი მარციო და ალფრედო პედულა არიან. "პარტენოპეის" ინტერესი დაადასტურა ფაბრიციო რომანომაც.


    საქართველოს ნაკრების ახალგაზრდა შემტევზე დღეს elfutbolero.us-მა დაწერა, საიდანაც ვიგებთ, რომ "ლურჯები" კვარაცხელიასთვის ადგილის გასათავისუფლებლად ემზადებიან.


    წყაროს თანახმად, "ნაპოლი" მექსიკელი გარემარბის, ირვინ ლოზანოს გასხვისებას გეგმავს. იტალიური კლუბის თავკაცი, ლუჩიანო სპალეტი ხვიჩას უნარებში დარწმუნებულია, ამიტომ მიიჩნევს, რომ გუნდში ლოზანოს ყოფნის საჭიროება აღარ არსებობს.


    სახელდება 26 წლის ფეხბურთელის მომავალი გუნდიც - ირვინით "მილანია" დაინტერესებული. გავრცელებული ხმების მიხედვით, "სან სიროზე" ახალი მფლობელები მოდიან, რომლებსაც კლუბის გაძლიერება აქვთ დაგეგმილი.


    შეგახსენებთ, რომ ხვიჩა სეზონის ბოლომდე "აჭარაბეთ არენაზე" იასპარეზებს. ეროვნულ ლიგაში მან უკვე 3 მატჩი ჩაატარა, სადაც "დინამოს" 2 გოლითა და 1 ასისტით შეეწია. 

    Facebook კომენტარები
    მეტი სიახლის ნახვა