• 07-05-2022
    გუცაევი: "ჩვენი ჩემპიონატის დონეს ამით შევაფასებთ"
    გუცაევი: "ჩვენი ჩემპიონატის დონეს ამით შევაფასებთ"

    საზოგადოებრივი მაუწყებლის გადაცემა "საფეხბურთო ტაიმ აუტში", დღეს ქართული ფეხბურთის ლეგენდა ვლადიმერ გუცაევმა ეროვნული ლიგის გუნდების საევროტურნირო შანსებზე ისაუბრა.


    "სულ ვამბობ, რომ მთავარი ევროთასებია. ჩვენ რაღაც შედეგი იქ უნდა ვაჩვენოთ და ამით შევაფასებთ, ჩვენი ჩემპიონატის დონემ აიწია თუ არა. თუ ევროთასებზე ისევ ისე გამოვედით, როგორც წინა წლებში, ჩათვალეთ, რომ იმავე დონეზე დავრჩით და იმავე წრეზე ვტრიალებთ. რაც არ უნდა დაძაბული ვითარება იყოს საქართველოს ჩემპიონატში, ეს არაფრის მთქმელი იქნება.


    ვუყურებთ ჩემპიონთა და ევროპის ლიგის თამაშებს, რა დონეა, ტაქტიკურად და ფიზიკურად როგორი მომზადებულები არიან. გუნდებს ბოლო წუთამდე და დამატებით დროშიც შეუძლიათ პრესინგით, მაღალ ტემპში ითამაშონ. თუ ევროთასებზე ერთი ქართული გუნდი მაინც გამოვა კარგად, მაშინ ვიტყვი, რომ სწორ გზაზე ვდგავართ. თუ არა, მაშინ ისევ ალტერნატივა უნდა ვეძებოთ – მაგალითად, უფრო მაღალი დონის ლეგიონერების ჩამოყვანა," - განაცხადა გუცაევმა.


    შეგახსენებთ, რომ ზაფხულში ბათუმის "დინამო" ჩემპიონთა ლიგის საკვალიფიკაციო ეტაპზე გამოვა, კონფერენს ლიგის ჯგუფში შესვლას კი თბილისის "დინამო", გორის "დილა" და თბილისის "საბურთალო" ეცდებიან.


    სხვათა შორის, ბათუმელები ევროტურნირებზე ქვეყნის ჩემპიონის რანგში პირველად გამოვლენ. შავიზღვისპირელები განუთესავნი იქნებიან და 17 მეტოქე ეყოლებათ, რომელთა სრული სია სეზონის დასრულების შემდეგ გვექნება.


    ცნობისთვის, ჩემპიონთა ლიგის საკვალიფიკაციო ეტაპი სტარტს 21 ივნისიდან აიღებს, ევროპა ლიგისა და კონფერენს ლიგის კი - 24 ივნისიდან.

    Facebook კომენტარები