• 05-08-2022
    პრეზიდენტი ადასტურებს - ლოჩოშვილი "ვერონაში" მიდის
    პრეზიდენტი ადასტურებს - ლოჩოშვილი "ვერონაში" მიდის

    ავსტრიული "ვოლფსბერგერის" პრეზიდენტის, დიტმარ რიგლერის განცხადებით, ლუკა ლოჩოშვილი ამ სატრანსფერო ფანჯარაზე გუნდს აუცილებლად შეიცვლის.


    "სატრანსფერო თანხაზე უარს ვერ ვიტყვით. ჩვენი მიზანი ყოველთვის ის იყო, რომ ლუკას წინსვლა ეჩვენებინა და შემდეგ სარფიან ფასად გაგვეყიდა," - თქვა რიგლერმა, რითაც ფაქტობრივად დაადასტურა, რომ ქართველი მცველი "ჰელას ვერონაში" გააგრძელებს კარიერას.


    "ჰელას ვერონას" ხსენება იტალიური პრესიდან გამომავალი ცნობების საფუძველზე შეგვიძლია. როგორც ირკვევა, "ყვითელ-ლურჯები" ლოჩოშვილში 1.5-1.6 მილიონ ევროს იხდიან.


    კლუბებს შორის შეთანხმება მიღწეულია. ახლა მოლაპარაკებები "ვერონასა" და ლუკას შორის მიმდინარეობს კონტრაქტის საკითხებზე.


    24 წლის ცენტრალური მცველისადმი ინტერესს "სამპდორია", "ტორინო" და "უდინეზეც" იჩენდნენ. Crystalsport-ის ცნობით, ბრძოლას გენუური კლუბი ჩამოშორდა, რადგან "სამპას" ლოჩოშვილის გადაბირებისთვის საჭირო ფინანსური სახსრები არ გააჩნია.


    აქვე გეტყვით, რომ ლუკამ "ვოლფსბერგერს" 2020 წელს თბილისის "დინამოდან" მიაშურა. ამ გუნდის მაისურით მან 71 მატჩში მიიღო მონაწილეობა, გაიტანა 2 გოლი და გააკეთა 1 ასისტი.


    Facebook კომენტარები
    მეტი სიახლის ნახვა