ალისონი: "ამ გუნდმა თავისი ისტორია უნდა დაწეროს"

მერსესაიდული "ლივერპულის" ფანტასტიკური სეზონი გრძელდება. "სქაუზერები" ჩემპიონთა ლიგის ფაზას უდანაკარგოდ ლიდერობენ და პრემიერ ლიგაშიც პირველ ადგილზე არიან; თან ისე, რომ მეორეადგილოსან "არსენალს" 6 ქულით უსწრებენ და მათზე 1-ით ნაკლები მატჩიც აქვთ ჩატარებული.

არნე სლოტის "ლივერპულს" ხშირად ადარებენ იურგენ კლოპის კოლექტივს, რომელმაც 2019/2020 წლების სეზონში ინგლისის პრემიერ ლიგა ძალიან იოლად მოიგო. ამ შედარებაზე "წითლების" ბრაზილიელ გოლკიპერს, ალისონსაც ჰკითხეს.

"ის გუნდი განსაკუთრებული იყო. ჩვენ დიდებულ შედეგებს მივაღწიეთ. ეს იყო პირველი პრემიერლიგური ტიტული ძალიან, ძალიან დიდი ხნის განმავლობაში.

გარდა ამისა, წინა სეზონში ჩემპიონთა ლიგაც მოვიგეთ.

ეს ორი სიტუაცია ერთმანეთს არ შეედრება. მთავარი, რაც მაბედნიერებს, ფეხბურთელების მაღალი დონეა. ჩვენ გვაქვს საკმარისი ხარისხი, რათა რაღაც გამორჩეული გავაკეთოთ. ყველაზე მნიშვნელოვანია, რომ ადგილზეა მონდომება, რომელიც ტიტულების მოსაგებადაა საჭირო.

ჩვენ არ გვჭირდება წარსულთან შედარება. ამ სეზონში ამ გუნდმა საკუთარი ისტორია უნდა დაწეროს," - თქვა ალისონმა.

მომდევნო მატჩი ლივერპულელებს ხვალ ელოდებათ. თბილისის დროით 21:15 საათიდან ისინი "ვესტ ჰემ იუნაიტედს" ესტუმრებიან.