ვინ უნდა ულიდეროს გუნდს კვარას არ ყოფნაში? - ანალიზი მატჩის წინ

20 მარტს საქართველოს ნაკრები სომხეთს დაუპირისპირდება.

მოგეხსენებათ, რომ უშუალოდ ამ შეხვედრაში მონაწილეობას გურამ კაშია და ხვიჩა კვარაცხელია ვერ მიიღებენ.

შეიძლება ითქვას, გუნდს 2 გამორჩეული ლიდერი აკლდება.

მთავარი დანაკლისი მაინც ხვიჩას არ ყოფნაა.

შესაძლოა მას თამაში არ მისდიოდეს, თუმცა 2-3 მცველი მას სულ თან დაჰყვება, რაც შეტევაში სივრცეებს ხსნის.

ვილი სანიოლი ალბათ ტაქტიკას არ შეცვლის, გიორგი მიქაუტაძე სასტარტოდან დაიწყებს, თუმცა ვინ იქნება მისი მეწყვილე კვარას არ ყოფნაში?

ბუდუ ზივივაძე, ზურიკო დავითაშვილი და გიორგი გულიაშვილი - ასეთია ფრანგი სპეციალისტის არჩევანი.

ბოლო პერიოდში ბუდუ შესანიშნავ ფორმაში შევიდა, მან ბუნდესლიგის ზედიზედ 2 შეხვედრაში გაიტანა.

გულიაშვილი მთელი სეზონია მაღალ დონეზე თამაშობს და "სარაევოს" წამყვანი ფიგურაა.

ასევე გუნდში ლიდერობს ზურიკო დავითაშვილიც, რომელსაც "სენტ-ეტიენში" კარგი სეზონი აქვს.

მთავარი არჩევანი მაინც ზურიკოსა და ბუდუს შორის გაკეთდება, რადგან გულიაშვილს დებიუტი ჯერაც არ ჰქონია. აქ გამოცდილების ფაქტორი მეტყველებს.

თუ მათაც შევადარებთ, კვარას პირდაპირი შემცვლელი უფრო ზურიკო უნდა იყოს, რადგან ხვიჩას სტილთან ის უფრო ახლოსაა ვიდრე ბუდუ.

დავითაშვილის სასტარტოში ყოფნის შემთხვევაში შეტევის წამოწყებისა და განვითარების როლი, რაც კვარას აქვს, მას ექნება.

თუმცა თუ სასტარტოდან ბუდუ დაიწყებს, შესაძლოა ეს როლი მიქაუტაძემ მოირგოს და დამაგვირგვინებელი ზივიზვაძე იყოს.

არჩევანი, რა საკვირველია, სანიოლზეა. თუ ის კვარას შეცვლას მისი სტილის ფეხბურთელით გადაწყვეტს, სასტარტოში ალბათ დავითაშვილს ვიხილავთ. ხოლო თუ ვილი სხვაგვარად მოიფიქრებს სასტარტოში ბუდუს უნდა ველოდოთ.

აქვე შეგახსენებთ, რომ მატჩი ჩვენი დროით 21:00 საათზე დაიწყება.